പേര് പോലെ തന്നെ കയ്പ്പ് രസമുള്ള കയ്പ്പക്ക കഴിക്കാൻ പലർക്കും ഇഷ്ടമില്ലാത്ത ഒരു ഭക്ഷ്യ വസ്തുവാണ് . എന്നാല ധാരാളം പോഷകങ്ങളും ധാതുക്കളും അടങ്ങിയിട്ടുള്ള കയ്പ്പക്ക പല അസുഖങ്ങളും അകറ്റി നിർത്താൻ കഴിവുള്ള ഒരു ഭക്ഷ്യ വസ്തു കൂടിയാണ് . അതിനാൽ നമ്മുടെ ഭക്ഷണക്രമത്തിൽ നിന്ന് ഇത് പൂർണ്ണമായും ഒഴിവാക്കുന്നത് ഉചിതമായിരിക്കില്ല .കയ്പ്പക്കയുടെ കയ്പ്പ് രസം മാറ്റാനുള്ള ചില എളുപ്പ വഴികൾ
കയ്പ്പക്കയുടെ കട്ടിയുള്ള തൊലി പാകം ചെയ്യുന്നതിന് മുൻപ് നന്നായി ചിരണ്ടി കളയുക എന്നതാണ് കയ്പു രസം കുറക്കാൻ വേണ്ടി ചെയ്യേണ്ട ഒന്നാമത്തെ കാര്യം . കയ്പക്കക്കുള്ളിലെ കുരു എടുത്തു കളയുക എന്നത് കയ്പ്പ് രസം കുറക്കാൻ വേണ്ടി പ്രധാനമായും ചെയ്യേണ്ട ഒന്നാണ് .
പാചകം ചെയ്യുന്നതിന് മുൻപ് കയ്പ്പക്ക അരിഞ്ഞു നന്നായി ഉപ്പ് പുരട്ടി അര മുക്കാൽ മണിക്കൂറോളം വെക്കുക . അതിനു ശേഷം കയ്പ്പക്ക പിഴിഞ്ഞ് ഉപ്പു വെള്ളം കളഞ്ഞതിന് ശേഷം , പച്ചവെള്ളത്തിൽ നന്നായി കഴുകി എടുക്കുക . കയ്പു രസം മാറാൻ ഏറ്റവും എളുപ്പത്തിൽ ചെയ്യാവുന്ന പരിഹാരമാണിത് . കൂടാതെ പാചകം ചെയ്യുമ്പോൾ ഉപ്പ് നോക്കി ആവശ്യമെങ്കിൽ മാത്രമേ അധികം ചേർക്കാവൂ .
അടുത്തതായി കയ്പ്പക്കയുടെ കയ്പ്പ് കളയാനുള്ള മറ്റൊരു മാർഗം നന്നായി വെള്ളം ചേർത്ത തൈരിൽ കുതിർക്കുക എന്നതാണ് . കയ്പ്പക്ക അരിഞ്ഞതിന് ശേഷം തൈരിൽ ഒരു മണിക്കൂർ നേരം കുതിർത്തു വെക്കുക . പാചകം ചെയ്യുന്നതിന് മുൻപായി കയ്പ്പക്ക നന്നായി കഴുകി മാത്രം ഉപയോഗിക്കുക .
വിനാഗിരിയും പഞ്ചസാരയും ചേർത്തുണ്ടാക്കിയ മിശ്രിതം തളിച്ച് കയ്പ്പക്ക കുറച്ചു നേരം വെച്ചതിനു ശേഷം പാചകം ചെയ്യുകയാണെങ്കിൽ കയ്പ്പ് രസം മാറി കിട്ടും .
