ലിസ്ബൺ: ഫോർമുല വൺ കാറോട്ട മത്സരങ്ങളിൽ മൈക്കൽ ഷൂമാർക്കറുടെ റെക്കോർഡ് മറികടന്ന് ലൂയിസ് ഹാമിൽട്ടൺ. 91 വിജയങ്ങളെന്ന മൈക്കൽ ഷൂമാർക്കറുടെ റെക്കോർഡാണ് ബ്രിട്ടന്റെ ഹാമിൾട്ടൺ മറി കടന്നത്. പോർച്ചുഗീസ് ഗ്രാൻഡ്പ്രീയിൽ ജയിച്ചതോടെയാണ് 92 വിജയങ്ങളോടെ ഏറ്റവും കൂടുതൽ ഫോർമുല വൺ റേസ് വിജയങ്ങളെന്ന റെക്കോർഡ് ഹാമിൽട്ടൺ കരസ്ഥമാക്കിയത്.
ഇക്കഴിഞ്ഞ ഒക്ടോബർ 11 ന് നടന്ന ജർമ്മനിയിലെ ന്യൂബർഗിലെ ഇംഫൽ ഗ്രാൻഡ് പ്രീയിൽ ഷൂമാർക്കറിന്റെ റെക്കോർഡിനൊപ്പം ഹാമിൾട്ടൺ എത്തിയിരുന്നു. 2007 ലെ കനേഡിയൻ ഗ്രാൻഡ് പ്രീയിൽ വിജയിച്ചാണ് ഹാമിൾട്ടൺ എഫ് വണ്ണിൽ തന്റെ വിജയങ്ങൾക്ക് തുടക്കമിട്ടത്.
ഫോർമുല വൺ ചാമ്പ്യൻഷിപ്പിൽ ഏറ്റവും കൂടുതൽ കിരീടങ്ങളെന്ന ഷൂമാർക്കറുടെ നേട്ടത്തിലേക്കെത്താനാണ് ഹാമിൽട്ടന്റെ പരിശ്രമം. ഏഴു കിരീടങ്ങളാണ് ഷൂ മാർക്കർ നേടിയിരിക്കുന്നത്. ആറു കിരീടങ്ങൾ ഹാമിൾട്ടൺ നേടിയിട്ടുണ്ട്.
