സൂപ്പുകളുടെ ചരിത്രം എന്ന് പറയുന്നത് പാചകത്തിന്റെ ചരിത്രം പോലെ പഴക്കമുള്ളതാണ്. സൂപ്പ് ഉണ്ടായതിന്റെ തെളിവുകൾക്കു തന്നെ ഏകദേശം ബി.സി. 20000ത്തോളം പഴക്കമുണ്ട്. 16-ാം നൂറ്റാണ്ടിൽ തെരുവുകച്ചവടക്കാര് വില്ക്കുന്ന, ഉയര്ന്ന സാന്ദ്രതയും കുറഞ്ഞ വിലയില് ലഭ്യമായതുമായ ‘സൂപ്പ്’ എന്നതിനെ സൂചിപ്പിക്കുന്നതായിട്ടാണ് ‘റസ്റ്റോറന്റ്’ എന്ന വാക്ക് ഫ്രാൻസിൽ ആദ്യമായി ഉപയോഗിക്കുന്നത്. 1765-ല് ഒരു പാരീസുകാരനാണ് സൂപ്പുകള്ക്ക് പ്രത്യേകമായി ഒരു കട തുറന്നത്. ഇത് ഭക്ഷണശാലകള്ക്ക് ആധുനിക പദമായ ‘റെസ്റ്റോറന്റ്’ എന്ന് പേരുവരാൻ കാരണമാക്കി എന്നാണ് ചരിത്രം പറയുന്നത്. ക്ലാസ്സിക് ഫ്രഞ്ച് പാചകരീതിയാണ് ഇന്നത്തെ സൂപ്പുകളെല്ലാം സൃഷ്ടിക്കാൻ കാരണം.
ഒരുപാട് ചേരുവകളുള്ള സൂപ്പ് പോഷകഗുണങ്ങളാൽ സമ്പുഷ്ടമാണ്. അതുപോലെ എളുപ്പത്തിൽ വയർ നിറയ്ക്കുവാനും എളുപ്പത്തിൽ ദഹനം നൽകാനും സൂപ്പിന് കഴിവുണ്ട്. ഈ സവിഷേതകളായിരിക്കും ഒരുപക്ഷെ സൂപ്പിന് ഇത്രയുമൊരു പ്രാധാന്യം സമൂഹത്തിൽ ഉണ്ടാക്കികൊടുത്തത്. ശരീരക്ഷീണത്തിനുള്ള ഒരു മറുമരുന്നായാണ് സൂപ്പിനെ പരസ്യം ചെയ്തിരുന്നത്. പച്ചക്കറികളുടെ എല്ലാ ഗുണഗണങ്ങളും സൂപ്പിലൂടെ മനുഷ്യ ശരീരത്തിലേക്ക് എത്തിച്ചേരുന്നു. വേവിച്ച പച്ചക്കറികളും, അതിന്റെ വെള്ളവും ശരീരത്തിന് ഒരുപാട് പോഷക ഗുണങ്ങൾ നൽകുന്നു.
ബീന്സ്, മത്സ്യം പോലുള്ളവ കൊണ്ടുള്ള സൂപ്പുകള് ശരീരത്തിന് വേണ്ട പ്രോട്ടീന് നല്കുന്നു. കുട്ടികൾക്കെല്ലാം വേണ്ട പച്ചക്കറികൾ ശരീരത്തിൽ എത്താൻ ഒരു എളുപ്പമാർഗം കൂടിയാണ് സൂപ്പ്. സൂപ്പാകുമ്പോൾ ഉണ്ടാക്കാൻ ഏറ്റവും എളുപ്പവുമാണ്, ഒപ്പം പോഷക ഗുണങ്ങളും ഏറെയാണ്. തക്കാളി സൂപ്പിൽ ഉൾപ്പെടുത്തുന്നതിലൂടെ ക്യാന്സർ വരാനുള്ള സാധ്യതയും കുറയ്ക്കുന്നു. സൂപ്പിലെ പച്ചക്കറികളില് ‘എ’, ‘സി’ പോലുള്ള ധാരാളം വിറ്റാമിനുകള് അടങ്ങിയിട്ടുണ്ട്. ക്രീം സൂപ്പുകള് കാത്സ്യം, വിറ്റാമിന്-ഡി എന്നിവയും ഉണ്ട്. ഇത് ആരോഗ്യത്തിനു ഗുണവും, നാവിനു രുചിയും നൽകുന്നു.
