ന്യൂഡൽഹി: ഡൽഹിയിൽ രാജ്യവിരുദ്ധ കലാപത്തിനിടെ പാർലമെൻറ് ആക്രമിക്കാനുള്ള ശ്രമത്തിൽ അന്വേഷണം ശക്തമാക്കി ഡൽഹി പൊലീസ്. അക്രമസംഭവങ്ങളുമായി ബന്ധപ്പെട്ട് ഡൽഹി പൊലീസ് എഫ്ഐആർ രജിസ്റ്റർ ചെയ്തു. കർത്തവ്യപഥ് പൊലീസ് സ്റ്റേഷനിൽ രജിസ്റ്റർ ചെയ്ത എഫ്ഐആറിൽ വധശ്രമം, പൊതുസേവകരെ ആക്രമിക്കൽ, പൊതുമുതൽ നശിപ്പിക്കൽ, സർക്കാർ ജോലിയിൽ തടസ്സം സൃഷ്ടിക്കൽ എന്നിവ ഉൾപ്പെടെയുള്ള വിവിധ ഗുരുതര വകുപ്പുകളാണ് ചുമത്തിയിരിക്കുന്നത്.
പ്രതിഷേധത്തിനിടെ ചിലർ ബാരിക്കേഡുകൾ തകർക്കുകയും സുരക്ഷാ സേനയെ ആക്രമിക്കുകയും ചെയ്തതിരുന്നു. സംഭവത്തിൽ പരിക്കേറ്റ പൊലീസ് ഉദ്യോഗസ്ഥരുടെ മൊഴിയും സിസിടിവി ദൃശ്യങ്ങളും ഉൾപ്പെടെ വിവിധ തെളിവുകൾ ശേഖരിച്ചാണ് അന്വേഷണം പുരോഗമിക്കുന്നത്.
അക്രമത്തിൽ പങ്കെടുത്തതായി സംശയിക്കുന്നവരെ തിരിച്ചറിയുന്നതിനായി ഡൽഹി പൊലീസ് മുഖം തിരിച്ചറിയൽ (Facial Recognition System) സാങ്കേതികവിദ്യ ഉപയോഗിച്ചുള്ള പരിശോധനയും ആരംഭിച്ചിട്ടുണ്ട്. പ്രതിഷേധ സ്ഥലത്തും പരിസരങ്ങളിലും സ്ഥാപിച്ച ക്യാമറകളിൽ നിന്നുള്ള ദൃശ്യങ്ങൾ പരിശോധിച്ച് പ്രതികളെ തിരിച്ചറിയാനുള്ള നടപടികളാണ് നടക്കുന്നത്.
തെളിവുകളുടെ അടിസ്ഥാനത്തിൽ കൂടുതൽ അറസ്റ്റ് ഉൾപ്പെടെയുള്ള നടപടികൾ സ്വീകരിക്കുമെന്ന് അന്വേഷണ ഉദ്യോഗസ്ഥർ അറിയിച്ചു. പ്രതിഷേധത്തിനിടെ നടന്ന അക്രമത്തിൽ പങ്കുള്ളവരെ നിയമത്തിന് മുന്നിൽ കൊണ്ടുവരുമെന്നും പൊലീസ് വ്യക്തമാക്കി
