അബുദാബി: റോയല് ചലഞ്ചേഴ്സ് ബാംഗ്ലൂരിനെ 6 വിക്കറ്റിന് തകര്ത്ത് ഡല്ഹി ക്യാപിറ്റല്സ്. 153 റണ്സ് വിജയലക്ഷ്യവുമായി ബാറ്റിംഗ് ആരംഭിച്ച ഡല്ഹി 6 പന്തുകള് ബാക്കി നിര്ത്തിയാണ് മത്സരം കൈപ്പിടിയിലൊതുക്കിയത്. പരാജയപ്പെട്ടെങ്കിലും ബാംഗ്ലൂര് പ്ലേ ഓഫിലേയ്ക്ക് യോഗ്യത നേടി. ജയത്തോടെ ഡല്ഹി പോയിന്റ് പട്ടികയില് രണ്ടാം സ്ഥാനക്കാരായാണ് പ്ലേ ഓഫിലെത്തിയത്.
6 പന്തില് 9 റണ്സ് നേടിയ പൃഥ്വി ഷായുടെ വിക്കറ്റ് ഡല്ഹിക്ക് ആദ്യം തന്നെ നഷ്ടമായിരുന്നു. ടൂര്ണമെന്റില് ഉടനീളം മികച്ച പ്രകടനം പുറത്തെടുത്ത ശിഖര് ധവാന് അര്ദ്ധ സെഞ്ച്വറി കുറിച്ചു. 41 പന്തുകള് നേരിട്ട ധവാന് 54 റണ്സുമായാണ് മടങ്ങിയത്. മൂന്നാം വിക്കറ്റില് അജിങ്ക്യ രഹാനെയുമായി ചേര്ന്ന് പടുത്തുയര്ത്തിയ കൂട്ടുകെട്ടാണ് ഡല്ഹിയുടെ വിജയം അനായാസമാക്കിയത്. 46 പന്തില് 5 ബൗണ്ടറികളും ഒരു സിക്സറും പറത്തിയ രഹാനെ 60 റണ്സ് നേടി.
ബാംഗ്ലൂരിന് വേണ്ടി ഷഹബാസ് അഹമ്മദ് 4 ഓവറില് 26 റണ്സ് വഴങ്ങി 2 വിക്കറ്റ് വീഴ്ത്തി. വാഷിംഗ്ടണ് സുന്ദര്, മൊഹമ്മദ് സിറാജ് എന്നിവര് ഓരോ വിക്കറ്റ് വീതം സ്വന്തമാക്കി. ഐപിഎല്ലില് നാളെ നടക്കുന്ന നിര്ണായക മത്സരത്തില് മുംബൈ ഇന്ത്യന്സ് സണ്റൈസേഴ്സ് ഹൈദരാബാദിനെ നേരിടും. നാളെ ജയിച്ചാല് ഹൈദരാബാദ് കൊല്ക്കത്തയെ മറികടന്ന് അവസാന സ്ഥാനക്കാരായി പ്ലേ ഓഫില് ഇടം നേടും. നിലവില് കൊല്ക്കത്തയാണ് നാലാം സ്ഥാനത്ത്.
