ബ്യൂണസ് അയേഴ്സ്: മുൻ ഫുട്ബോൾ താരം ഡീഗോ മറഡോണയെ ശസ്ത്രക്രിയയ്ക്ക് വിധേയനാക്കി. തലച്ചോറിൽ രക്തം കട്ടപിടിച്ചതിനെ തുടർന്നാണ് മറഡോണയെ ശസ്ത്രക്രിയയ്ക്ക് വിധേയനാക്കിയത്. അദ്ദേഹം അപകട നില തരണം ചെയ്തതായും ആരോഗ്യ നില തൃപ്തരമാണെന്നും ആശുപത്രി വൃത്തങ്ങൾ അറിയിച്ചു.
വിഷാദ രോഗത്തെ തുടർന്ന് കഴിഞ്ഞ ദിവസമാണ് മറഡോണയെ ആശുപത്രിയിൽ പ്രവേശിപ്പിച്ചത്. പിന്നീട് നടത്തിയ വിദഗ്ധ പരിശോധനയിലാണ് തലച്ചോറിൽ രക്തം കട്ടപിടിച്ചതായി ശ്രദ്ധയിൽപ്പെട്ടത്. ഉടൻ തന്നെ അദ്ദേഹത്തെ ശസ്ത്രക്രിയയ്ക്ക് വിധേയനാക്കുകയായിരുന്നു.
ലാ പ്ലാറ്റയിലെ ഒരു സ്വകാര്യ ആശുപത്രിയിലാണ് നിലവിൽ അദ്ദേഹം ചികിത്സയിൽ കഴിയുന്നത്. മറ്റ് ആരോഗ്യ പ്രശ്നങ്ങളില്ലെന്നും എത്രയും വേഗം ആശുപത്രി വിടാൻ കഴിയുമെന്നുമാണ് ബന്ധപ്പെട്ട വൃത്തങ്ങൾ വ്യക്തമാക്കുന്നത്. ജിംനാസിയ വെ എസ്ഗ്രിമ എന്ന ഫുട്ബോൾ ടീമിന്റെ കോച്ചായാണ് അദ്ദേഹം പ്രവർത്തിക്കുന്നത്.
