പല വീട്ടമ്മമാരുടെയും മുഖ്യ ശത്രുവാണ് പാറ്റ. എത്രയൊക്കെ പാറ്റകളെ കൊന്നാലും വീണ്ടും വീണ്ടും പെരുകുകയും ചെയ്യും. കാണുമ്പോൾ അറപ്പുളവാക്കുന്നതിനുമപ്പുറം പലതരം രോഗവാഹകരായും പാറ്റകളെ കണക്കാക്കുന്നു. പാറ്റകളുടെ എണ്ണം വർധിക്കുന്നത് പലതരം രോഗങ്ങൾ ഉണ്ടാവാനും കാരണമാകുന്നു.
വീടുകളിൽ തന്നെ ലഭ്യമായ പല വസ്തുക്കൾ ഉപയോഗിച്ച് നമുക്ക് പാറ്റകളെ ഇല്ലാതാക്കാവുന്നതാണ്. അത്തരം ചില വിദ്യകൾ എന്തെല്ലാം ആണെന്ന് നോക്കാം.
ഒരു നാരങ്ങ, രണ്ട് ടേബിൾ സ്പൂൺ ബേക്കിംഗ് സോഡ എന്നിവ ഒരു ലിറ്റർ ചൂടുവെള്ളത്തിൽ ചേർക്കുക. ശേഷം ഇത് അടുക്കളയിലെ സിങ്കിന്റെ ഡ്രെയിനേജിൽ ഒഴിക്കുകയോ മറ്റോ ചെയ്യാവുന്നതാണ്. പാറ്റകളുടെ ശല്യം ഇല്ലാതാക്കാനുള്ള ഏറ്റവും ഫലപ്രദമായ ഒരു മാർഗ്ഗം ആണിത്.
പാറ്റകൾ കൂടുതലായി കാണപ്പെടുന്ന സ്ഥലങ്ങളിൽ കറുവപ്പട്ടയുടെ പൊടി വിതറുന്നത് പാറ്റകളെ തുരത്തുവാനുള്ള ഏറ്റവും എളുപ്പമുള്ള മാർഗ്ഗം ആണ്.
എല്ലാവീടുകളിലും ലഭ്യമായ വിനാഗിരി ഉപയോഗിച്ചുള്ളതാണ് മറ്റൊന്ന്. വെളുത്ത വിനാഗിരിയും ചൂടുവെള്ളവും ചേർത്തതിന് ശേഷം സിങ്കിലും മറ്റ് പൈപ്പ് കണക്ഷനുകളിലും ഒഴിക്കുക.
ബോറിക് ആസിഡ്, പഞ്ചസാര എന്നിവ ചേർത്തതിന് ശേഷം പാറ്റകളെ കാണാറുള്ള സ്ഥലങ്ങളിൽ വിതറുക. പഞ്ചസാര പാറ്റകളെ ആകർഷിക്കും. എന്നാൽ മിശ്രിതത്തിൽ അടങ്ങിയിരിക്കുന്ന ബോറിക് ആസിഡ് പാറ്റകളെ കൊല്ലാൻ സഹായിക്കുന്നു. എന്നാൽ അതേ സമയം വീടുകളിൽ വളർത്തുമൃഗങ്ങൾ ഉണ്ടെങ്കിൽ ഈ മിശ്രിതം ഉപയോഗിക്കാതിരിക്കുക. മിശ്രിതത്തിലെ ബോറിക് ആസിഡ് വളർത്തുമൃഗങ്ങൾക്ക് ദോഷകരമാണ്.
ആര്യവേപ്പ് സത്തും വെള്ളവും ചേർത്തതിന് ശേഷം സ്പ്രെയർ ഉപയോഗിച്ച് പാറ്റകൾ ഉണ്ടാവാൻ സാധ്യതയുള്ള സ്ഥലങ്ങളിൽ സ്പ്രേ ചെയ്യുക. ആര്യവേപ്പ് സത്തിന് പകരം ആര്യവേപ്പ് ഇല പൊടിച്ചത് ആണ് ഉപയോഗിക്കുന്നതെങ്കിൽ പാറ്റകൾ ഉണ്ടാവാൻ സാധ്യതയുള്ള സ്ഥലങ്ങളിൽ കാലത്തും വൈകുന്നേരവും വിതറുക.
