ഒട്ടുമിക്ക വീട്ടമ്മമാരും രാവിലെ കഴിയ്ക്കാന് ഉണ്ടാക്കുന്ന ഒരു പലഹാരമാണ് ദോശ. എന്നാല് എല്ലാ സമയത്തും ദോശ കുട്ടികള്ക്ക് ഇഷ്ടപ്പെടണമെന്നില്ല. അതുകൊണ്ടു തന്നെ ദോശ മാവ് ഉപയോഗിച്ച് ഒരു വ്യത്യസ്തമായ പലഹാരം ഉണ്ടാക്കി കൊടുത്താല് കുട്ടികള് പെട്ടെന്ന് തന്നെ ഇഷ്ടപ്പെടുകയും കഴിക്കുകയും ചെയ്യും. അതിനായി ക്യാബേജ്, കാരറ്റ്, സവാള, കാപ്സിക്കം എന്നിവ നീളത്തില് അരിഞ്ഞെടുക്കുക. ഒരു പാന് ചൂടാക്കി അതുലേക്ക് നെയ്യ് ഒഴിച്ചു കൊടുക്കുക. നന്നായി ചൂടായി വരുമ്പോള് അതിലേക്ക് അരിഞ്ഞു ക്യാബേജ്, കാരറ്റ്, സവാള, കാപ്സിക്കം എന്നിവ ചേര്ത്ത് കൊടുക്കുക.
അല്പം ഉപ്പു കൂടി ചേര്ത്ത് നന്നായി വഴറ്റുക. പച്ച മണം മാറും വരെ മാത്രം വഴറ്റിയാല് മതി. അധിക നേരം വഴറ്റിയാല് ഇതിന്റെ രുചി നഷ്ടപ്പെടും. അല്പം കുരുമുളകു പൊടി കൂടി ചേര്ത്ത ശേഷം തീ ഓഫ് ചെയ്ത് മറ്റൊരു ഒരു പാത്രത്തിലേക്ക് തണുക്കാനായി മാറ്റിവയ്ക്കുക. തണുത്ത ശേഷം ഇതിലേക്ക് മയോണൈസ് ഒഴിച്ചു കൊടുക്കുക. ഇവ നന്നായി മിക്സ് ചെയ്യുക. അതിനു ശേഷം ദോശക്കല്ല് വെച്ച് നന്നായി നെയ്യൊഴിച്ച് അധികം കട്ടിയില്ലാതെ ദോശ ചുട്ടെടുക്കുക.
ഈ ദോശയിലേക്ക് നേരത്തെ തയ്യാറാക്കിയ വെജിറ്റബിള് മയോണൈസ് മിശ്രിതം ചേര്ത്ത് റോള് ചെയ്യുക. സ്വാദിഷ്ടമായ പലഹാരം തയ്യാര്. രാവിലെ ബാക്കി വരുന്ന ദോശയുടെ മാവ് ഉപയോഗിച്ച് വൈകുന്നേരങ്ങളില് കുട്ടികള്ക്ക് ഉണ്ടാക്കി കൊടുക്കാവുന്ന ഏറ്റവും നല്ലൊരു പലഹാരം കൂടിയാണിത്. കുട്ടികള് ഒരു മടുപ്പും കൂടാതെ ഇത് കഴിക്കുകയും ചെയ്യും, മറ്റ് ദോശകളില് നിന്നും വ്യത്യസ്തമായ ഒരു രുചിയാണ് ഇതിനുള്ളത്.
