ന്യൂഡല്ഹി: സുശാന്ത് സിംഗ് രാജ്പുതിന്റെ മരണവുമായി ബന്ധപ്പെട്ട് മാദ്ധ്യമങ്ങള്ക്ക് ഡല്ഹി ഹൈക്കോടതിയുടെ നോട്ടീസ്. സുശാന്ത് സിംഗന്റെ മരണവുമായി ബന്ധപ്പെട്ട് അനാവശ്യ കുപ്രചരണങ്ങള് നടത്തുന്നതായി ചൂണ്ടിക്കാട്ടി ബോളിവുഡിലെ നിര്മാണ കമ്പനികള് സമര്പ്പിച്ച ഹര്ജിയിലാണ് നടപടി.
റിപ്പബ്ലിക്ക് ടി വി ,ടൈംസ് നൗ തുടങ്ങിയ ചാനലുകള്ക്കെതിരെയാണ് കോടതിയില് ഹര്ജി എത്തിയത്. റിപ്പബ്ലിക് ടിവിയുടെയും, ടൈംസ് നൗ ചാനലിന്റെയും എഡിറ്റര്മാര്ക്കാണ് കോടതി നോട്ടീസ് അയച്ചത്. ബോളിവുഡ് താരങ്ങള്ക്കെതിരെ അപകീര്ത്തികരമായ പരാമര്ശങ്ങള് ഈ ചാനലുകളിലോ അവയുടെ ഔദ്യോഗിക സാമൂഹ്യമാദ്ധ്യമ അക്കൗണ്ടുകളിലോ ഉണ്ടാകരുതെന്ന് കോടതി നിര്ദ്ദേശിച്ചു. കേബിള് ടിവി റെഗുലേഷന് നിയമത്തിന് കീഴിലുള്ള ചട്ടങ്ങള് മാദ്ധ്യമങ്ങള് പാലിക്കുമെന്ന് ചാനലുകള്ക്ക് വേണ്ടി ഹാജരായ അഭിഭാഷകര് ഉറപ്പുനല്കി.
സുശാന്ത് സിംഗിന്റെ മരണത്തിന് പിന്നാലെ ബോളിവുഡ് താരങ്ങളെ മാദ്ധ്യമവിചാരണ ചെയ്യുന്നതിനെതിരേയാണ് ചലച്ചിത്ര നിര്മാതാക്കള് ഒക്ടോബറില് കോടതിയെ സമീപിച്ചത്. ബോളിവുഡിലെ മുഴുവന് താരങ്ങളും ക്രിമിനലുകളാണെന്ന തരത്തില് വാര്ത്തകള് പ്രചരിപ്പിക്കുകയാണെന്നും മാദ്ധ്യമങ്ങള് തങ്ങളുടെ സ്വകാര്യതയിലേക്ക് കടക്കുന്നതായും ഇവര് ആരോപിച്ചിരുന്നു. ജസ്റ്റീസ് രാജീവ് ഷാക്ദേര് ആണ് ഹര്ജി പരിഗണിച്ചത്.
