കറാച്ചി: ന്യൂസിലന്ഡ് ക്രിക്കറ്റിനെതിരെ രൂക്ഷവിമര്ശനവുമായി മുന് പാകിസ്താന് താരം ശുഐബ് അക്തര്. പാകിസ്താന് ടീമിനെ വെറുമൊരു ക്ലബ്ബിനെപ്പോലെ കാണരുത്. പാകിസ്താന് ഒരു അന്താരാഷ്ട്ര ടീമാണെന്നും ക്രിക്കറ്റുമായി മുന്നോട്ടുപോകാന് തങ്ങള്ക്ക് ന്യൂസിലന്ഡിന്റെ സഹായം ആവശ്യമില്ലെന്നും അക്തര് പറഞ്ഞു.
ബുദ്ധിമുട്ടേറിയ സമയത്തും ന്യൂസിലന്ഡില് വന്ന് കളിക്കാന് തയ്യാറായ പാക് ടീമിനോട് ന്യൂസിലന്ഡ് കടപ്പെട്ടിരിക്കണം. പാകിസ്താന് ടീമിനോട് കുറച്ചുകൂടി മാന്യമായി പെരുമാറണമെന്നും ലോകത്തെ ഏറ്റവും മഹത്തരമായ ഒരു രാജ്യത്തെക്കുറിച്ച് ഇത്തരത്തില് പരുഷമായി സംസാരിക്കരുതെന്നും അക്തര് പറഞ്ഞു. ഇതിന് പുറമെ, ന്യൂസിലന്ഡ് പര്യടനം ഉപേക്ഷിച്ച് ടീമിനെ തിരികെ വിളിക്കണമെന്നും അടുത്ത അഞ്ച് വര്ഷത്തേയ്ക്ക് ന്യൂസിലന്ഡുമായി ക്രിക്കറ്റ് കളിക്കരുതെന്നും പാക് ക്രിക്കറ്റ് ബോര്ഡിനോട് അക്തര് ആവശ്യപ്പെട്ടു.
നേരത്തെ, ന്യൂസിലന്ഡ് പര്യടനത്തിനെത്തിയ പാകിസ്താന് ടീമിലെ ആറ് പേര്ക്ക് കൊറോണ സ്ഥിരീകരിച്ചിരുന്നു. ആദ്യ ദിനം തന്നെ ക്വാറന്റൈന് ലംഘിച്ച് താരങ്ങള് പുറത്തിറങ്ങിയെന്നും ഇതിന്റെ സിസിടിവി ദൃശ്യങ്ങള് തങ്ങളുടെ പക്കലുണ്ടെന്നും ന്യൂസിലന്ഡ് ക്രിക്കറ്റ് അറിയിച്ചിരുന്നു. ന്യൂസിലന്ഡ് ആരോഗ്യമന്ത്രാലയം ഉള്പ്പെടെ പാക് ടീമിനെതിരെ വിമര്ശനവുമായി രംഗത്തെത്തിയിരുന്നു.
