ടെഹ്‌റാൻ: വിവാഹിതനായി മണിക്കൂറുകൾക്കകം ഇറാനിൽ യുവാവിന്റെ വധശിക്ഷ നടപ്പാക്കി. സർക്കാർ വിരുദ്ധ പ്രക്ഷോഭങ്ങളിൽ പങ്കെടുത്തെന്ന കേസിൽ വധശിക്ഷയ്ക്ക് വിധിക്കപ്പെട്ട 25കാരനായ അലിറേസ സെപാഹിയെയാണ് തിങ്കളാഴ്ച തൂക്കിലേറ്റിയത്. ജയിലിൽ കഴിയുന്ന പ്രതിശ്രുതവധു മഹ്ഷാദ് കേശാനിയുമായി വിവാഹിതനായതിന് പിന്നാലെയായിരുന്നു വധശിക്ഷ. 22കാരിയായ കേശാനി ഇതേ പ്രക്ഷോഭങ്ങളുമായി ബന്ധപ്പെട്ട കേസിൽ അഞ്ച് വർഷത്തെ തടവുശിക്ഷ അനുഭവിക്കുകയാണ്.
സെപാഹിയുടെ വധശിക്ഷ ഉടൻ നടപ്പാക്കിയേക്കുമെന്ന ആശങ്കയിലാണ് കേശാനി വിവാഹം നടത്താൻ തീരുമാനിച്ചത്. ജയിലിലെ ഫോൺ ഉപയോഗിച്ചായിരുന്നു ലളിതമായ വിവാഹച്ചടങ്ങ്. മനുഷ്യാവകാശ അഭിഭാഷകൻ അമിർസലാർ ദാവൂദിയാണ് ചടങ്ങ് ഏകോപിപ്പിച്ചത്. ജയിലിലുണ്ടായിരുന്ന ഇരുവരുടെയും പിതാക്കന്മാരുടെ സാന്നിധ്യത്തിൽ വിവാഹത്തിന് അനുഗ്രഹം നൽകി.
ഖുർആന്റെ ഒരു പ്രതി, ചുവന്ന റോസ്, കുങ്കുമപ്പൂ ചേർത്ത മിഠായി എന്നിവയായിരുന്നു കേശാനിയുടെ കുടുംബം വിവാഹസമ്മാനമായി നൽകിയതെന്നാണ് റിപ്പോർട്ടുകൾ. സെപാഹിയുടെ വധശിക്ഷ നേരത്തേ ജൂലൈയിൽ നടപ്പാക്കാൻ തീരുമാനിച്ചിരുന്നു. എന്നാൽ തൂക്കിലേറ്റുന്നതിനായി കൊണ്ടുപോകുന്നതിനിടെ ഹൃദയാഘാതമുണ്ടായതിനെത്തുടർന്ന് ശിക്ഷ മാറ്റിവെക്കുകയായിരുന്നു.
ഞായറാഴ്ച കുടുംബത്തിന് അവസാനമായി കാണാൻ അവസരം നൽകിയതോടെ വധശിക്ഷ ഉടൻ നടപ്പാക്കുമെന്ന ആശങ്ക ശക്തമായി. ഇതിനു പിന്നാലെയാണ് വിവാഹം നടത്താൻ പ്രതിശ്രുതവധു അടിയന്തരമായി ശ്രമിച്ചത്. മറ്റൊരു പ്രതിയായ അലിറേസ റഈസിയെയും സെപാഹിക്കൊപ്പം തൂക്കിലേറ്റിയിട്ടുണ്ട്.
ജനുവരി എട്ടിന് ഇസ്ഫഹാനിലെ അലിഖാനി സ്ക്വയറിൽ നടന്ന പ്രക്ഷോഭത്തിനിടെ നാല് സുരക്ഷാ ഉദ്യോഗസ്ഥർ കൊല്ലപ്പെട്ട സംഭവവുമായി ബന്ധപ്പെട്ട് പ്രതിചേർക്കപ്പെട്ട 12 പേരിൽ ഒരാളായിരുന്നു സെപാഹി. പ്രതികളുടെ നിർബന്ധിപ്പിച്ച് കുറ്റംസമ്മതിപ്പിച്ചതാണെന്ന ആരോപണം മനുഷ്യാവകാശ സംഘടനകൾ ഉന്നയിച്ചിരുന്നു. ഇറാനിലെ പ്രക്ഷോഭങ്ങളുമായി ബന്ധപ്പെട്ട വധശിക്ഷകൾ അന്താരാഷ്‌ട്ര മനുഷ്യാവകാശ സംഘടനകളുടെ വിമർശനത്തിന് വിധേയമായിട്ടുണ്ട്.
