കേരള പ്രീമിയർ ലീഗ് ടീമായ കോവളം എഫ്.സിയുടെ ഔദ്യോഗിക ഗാനം പുറത്തിറങ്ങി. ഗാനരചയിതാവ് വിനായക് ശശികുമാർ രചിച്ച് യുവ സംഗീത സംവിധായകൻ പ്രശാന്ത് മോഹൻ എം.പി സംഗീതം പകർന്ന ഗാനം ആലപിച്ചിരിക്കുന്നത് മധു ബാലകൃഷ്ണനും , സിത്താര കൃഷ്ണകുമാറും ചേർന്നാണ്. കടലിന്റെ ഫുട്‍ബോൾ ആവേശം ദൃശ്യങ്ങളിലും സംഗീതത്തിലും നിറയുന്ന ഗാനത്തിന് വലിയ സ്വീകരണമാണ് സോഷ്യൽ മീഡിയയിൽ ലഭിക്കുന്നത്. ഹൈമ , 666 എന്നീ ചലച്ചിത്രങ്ങളുടെ സംവിധായകൻ കൂടിയായ ഗോകുൽ കാർത്തിക്കാണ് ഗാനത്തിന്റെ ദൃശ്യങ്ങൾ സംവിധാനം ചെയ്തിരിക്കുന്നത്.സുകേഷ് കോട്ടത്തലയാണ് ഛായാഗ്രഹണം നിർവഹിച്ചിരിക്കുന്നത്. സ്പാർക്ക് ലേർണിംഗ്‌സിന്റെ ബാനറിൽ പ്രശാന്ത് കാഞ്ഞിരംകുളമാണ് നിർമാണം നിർവഹിച്ചിരിക്കുന്നത്.
യൂത്ത് ലെവലിൽ ഐ ലീഗ് കളിച്ചിട്ടുള്ള ടീമാണ് കോവളം എഫ്.സി . 2009ൽ വിഴിഞ്ഞം കേന്ദ്രമാക്കിയാണ് കോവളം എഫ്.സി പ്രവർത്തനം ആരംഭിച്ചത്. നിലവിൽ 4 വയസ് മുതൽ 25 വയസ് വരെ പ്രായമുള്ള നൂറ്റി അൻപതോളം കളിക്കാർ കോവളം എഫ്.സിയുടെ കീഴിൽ പരിശീലനം നേടുന്നുണ്ട്. കേരള പ്രീമിയർ ലീഗിനൊപ്പം , എലൈറ്റ് ഡിവിഷനിലും കളിക്കുന്ന ഏക ക്ലബ്ബ് കൂടിയാണ് കോവളം എഫ്.സി. അദാനി പോർട്ടിന്റെ സാമൂഹിക സുരക്ഷാ പദ്ധതിയിലും ഇടം പിടിച്ചിട്ടുള്ള ക്ലബ്ബിന്റെ മുഖ്യ സ്‌പോൺസർമാർ സ്പാർക്ക് ലേർണിംഗ്സും , ഫെഡറൽ ബാങ്കുമാണ്. ശശി തരൂർ എം.പി , മാധ്യമ പ്രവർത്തകനും പ്രവാസിയുമായ ടി.ജെ മാത്യൂസ് , ചന്ദ്രഹാസൻ ,ബാലഗോപാൽ ഐ.എ.എസ് എന്നിവരാണ് ക്ലബ്ബ് പ്രവർത്തനങ്ങൾ വിലയിരുത്തുന്നത്.
https://youtu.be/7RV634Qvydo
