1970 ല്‍ കേരള യൂണിവേഴ്‌സിറ്റിയില്‍ നടന്ന നാടക മത്സരത്തില്‍ നായികയും നായകനുമായി തിളങ്ങിയത് മലയാള സിനിമയുടെ പ്രിയ താരങ്ങളായിരുന്നു. നായകന്‍, മലയാള സിനിമയിലെ ഹാസ്യ സാമ്രാട്ടായ ജഗതി ശ്രീകുമാറാണ്. നായിക, മലയാള സിനിമയില്‍ ഒരുപിടി നല്ല കഥാപാത്രങ്ങള്‍ സമ്മാനിച്ച് സൗമ്യമായ മുഖത്തോടെ നമുക്കു മുന്നിലെത്തിയ രവി വള്ളത്തോളാണ്. സ്‌കൂള്‍ കാലഘട്ടത്തില്‍ തുടങ്ങിയ സൗഹൃദം പിന്നീട് കോളേജിലും അവിടെ നിന്ന് സിനിമയിലും വരെ എത്തി.
അമ്പതോളം നാടകങ്ങളില്‍ ഇവര്‍ ഒരുമിച്ച് അഭിനയിച്ചിട്ടുണ്ട്. തിരുവനന്തപുരം മാര്‍ ഇവാനിയോസ് കോളേജിലാണ് ഇരുവരും ബിരുദം പഠനം പൂര്‍ത്തിയാക്കിയത്. രണ്ടുപേരും നാടക പശ്ചാത്തലമുള്ള കുടുംബത്തില്‍ ജനിച്ചു വളര്‍ന്നവരാണ്. പ്രമുഖ നാടകാചാര്യനായ ജഗതി എന്‍.കെ. ആചാരിയുടെ മകനായ ജഗതി ശ്രീകുമാര്‍, തിരുവനന്തപുരം ജഗതിയിലാണ് ജനിച്ചത്. അഞ്ചാം ക്ലാസില്‍ പഠിക്കുമ്പോള്‍ തന്നെ നാടകത്തില്‍ അരങ്ങേറ്റം കുറിച്ചു. പിന്നീട് സിനിമയിലേക്ക്.
കന്യാകുമാരി എന്ന ചിത്രത്തിലൂടെയാണ് ജഗതി ശ്രീകുമാര്‍ സിനിമ രംഗത്തേക്ക് കടന്നു വരുന്നത്. എന്നാല്‍ ചട്ടമ്പിക്കല്യാണി എന്ന ചിത്രത്തിലെ ഹാസ്യ കഥാപാത്രമാണ് അദ്ദേഹത്തെ മലയാളികള്‍ക്ക് പരിചിതനാക്കിയത്. പ്രശസ്ത നാടകകൃത്ത് ടി.എന്‍. ഗോപിനാഥന്‍ നായരുടെ മകനായി മലപ്പുറം ജില്ലയിലാണ് രവിവള്ളത്തോള്‍ ജനിച്ചത്. ദൂരദര്‍ശിനിലെ വൈതരണി എന്ന സീരിയലിലൂടെയാണ് അഭിനയ രംഗത്ത് തുടക്കം കുറിച്ചത്. പിന്നീട് 1987 ല്‍ പുറത്തിറങ്ങിയ സ്വാതിതിരുനാള്‍ എന്ന ചിത്രത്തിലൂടെ സിനിമാ രംഗത്തേക്ക് കാലെടുത്തു വെച്ചു. മലയാള സിനിമയ്‌ക്ക് ഒരിക്കലും മറന്നുകളയാന്‍ സാധിക്കാത്ത രണ്ടു മുഖങ്ങളാണിവര്‍.
