മാഡ്രിഡ്: സ്പാനിഷ് ലീഗില്‍ അവസാന സ്ഥാനക്കാരുടെ പോരാട്ടത്തില്‍ വല്ലാഡോലിഡ് ഒസാസുനയെ തോല്‍പ്പിച്ചു. രണ്ടിനെതിരെ മൂന്ന് ഗോളുകള്‍ക്കാണ് വല്ലാഡോലിഡിന്റെ ജയം. ഷോണ്‍ വീസ്മാന്റെ ഇരട്ട ഗോളുകളാണ് കളിയില്‍ ആവേശജയം വല്ലാഡോലിഡിന് സമ്മാനിച്ചത്.
കളിയുടെ 7-ാം മിനിറ്റില്‍ത്തന്നെ ഷോണ്‍ ആദ്യ ഗോള്‍ നേടി. എന്നാല്‍ 27-ാം മിനിറ്റില്‍ ആന്റേ മുദിമിര്‍ സമനില ഗോള്‍ നേടി. ആദ്യ പകുതി തീരുംമുന്നേ ഒസാസുന റോബര്‍ട്ടോ ടോറസ്സിലൂടെ 2-1ന്റെ ലീഡ് നേടി. 56-ാം മിനിറ്റില്‍ പെനാല്‍റ്റി മുതലാക്കി ഫാബിയാന്‍ ഒറേലെന്ന വല്ലാഡോലിഡിനായി സമനില പിടിച്ചു. 76-ാം മിനിറ്റില്‍ ഷോണ്‍ ടീമിന് വിജയഗോളും സമ്മാനിച്ചു.
ഇന്ന് നടക്കുന്ന മത്സരങ്ങളില് 13-ാം സ്ഥാനത്തുള്ള വലന്‍സിയ 14-ാം സ്ഥാനത്തുള്ള അത്‌ലറ്റിക് ക്ലബ്ബിനേയും നേരിടും. രണ്ടാം മത്സരത്തില്‍ ആറാം സ്ഥാനത്തുള്ള സെവിയ പതിനഞ്ചാം സ്ഥാനത്തുള്ള ഗെറ്റഫയേയും മൂന്നാം മത്സരത്തില്‍ 12-ാം സ്ഥാനത്തുള്ള അലാവെസ് പട്ടികയിലെ അവസാന സ്ഥാനക്കാരായ ഹുയെസ്‌കയേയും നേരിടും.
