മിലാന്: ലൂകാക്കുവിന്റെ മികവില്‍ ഇന്റര്‍മിലാനും ക്രിസ്റ്റിയാനോ റൊണാള്‍ഡോയുടെ മികവില്‍ യുവന്റസും സിരി എയില്‍ മികച്ച ജയം സ്വന്തമാക്കി. യുവന്റസ് 3-1ന് ജെനോവയേയും അതേ ഗോള്‍ വ്യത്യാസത്തില്‍ ഇന്റര്‍ കാഗ്ലിയാരിയേയും തോല്‍പ്പിച്ചു. സ്റ്റാര്‍ സ്‌ട്രൈക്കര്‍മാരായ റൊമേലൂ ലൂകാക്കു ഇന്റര്‍ മിലാന് വേണ്ടിയും ക്രിസ്റ്റ്യാനോ യുവന്റസിനായും തിളങ്ങി.
യുവന്റസ് പൗളോ ഡീ ബാലയിലൂടെയാണ് 57-ാം മിനിറ്റില്‍ ആദ്യ ഗോള്‍ നേടിയത്. എന്നാല്‍ നാലു മിനിറ്റിനകം സമനില പിടിച്ച് ജെനോവ ലീഗ് ചാമ്പ്യന്മാരെ ഞെട്ടിച്ചു. കളിയുടെ രണ്ടാം പകുതിയില്‍ കളം നിറഞ്ഞ ക്രിസ്റ്റ്യാനോ 78, 89 മിനിറ്റുകളില്‍ ലഭിച്ച പെനാല്‍റ്റികള്‍ വലയിലെത്തിച്ച് ടീമിന് ആധികാരിക ജയം സമ്മാനിച്ചു.യുവന്റസ് പട്ടികയില്‍ നാലാം സ്ഥാനത്താണ്.
ഇന്റര്‍ മിലാന് കാഗ്ലിയാരിയെയാണ് തോല്‍പ്പിച്ചത്. 41-ാം മിനിറ്റില്‍ കാഗ്ലിയാരിയെ മുന്നിലെത്തിച്ച് റിക്കാഡോ സ്‌കോട്ടില്‍ ഞെട്ടിച്ചു. എന്നാല്‍ രണ്ടാം പകുതിയില്‍ മൂന്നു ഗോളുകള്‍ തിരിച്ചടിച്ച്് ഇന്റര്‍ മിലാന് കളി സ്വന്തമാക്കി. 77-ാം മിനിറ്റില്‍ നിക്കോളോ ബറേല സമനില പിടിച്ചപ്പോള്‍ 84-ാം മിനിറ്റില്‍ ഡാനിയെലോ അംബ്രോസിയോ രണ്ടാം ഗോളും നേടി. റൊമേലു ലൂക്കാകു 94-ാം മിനിറ്റില്‍ മൂന്നാം ഗോളും സ്വന്തമാക്കി.
