ന്യൂഡൽഹി: ഇന്ത്യയിലെ പ്രമുഖ മെസേജിംഗ് ആപ്ലിക്കേഷൻ വാട്ട്സ്ആപ്പിന്റെ പേയ്മെന്റ് ഫീച്ചർ ആരംഭിച്ചു. എസ്ബിഐ, എച്ച്ഡിഎഫ്സി, ഐസിഐസിഐ, ആക്സിസ് ബാങ്ക് എന്നീ ബാങ്കുകളുമായി സഹകരിച്ചാണ് പേയ്മെന്റ് സേവനത്തിന് തുടക്കം കുറിച്ചതെന്ന് വാട്ട്സ് ആപ്പ് വ്യക്തമാക്കി.
നാഷണൽ പേയ്മെന്റ് കോർപ്പറേഷൻ ഓഫ് ഇന്ത്യയുടെ യുപിഐ സേവനത്തിന്റെ അടിസ്ഥാനത്തിലാണ് പുതിയ പേയ്മെന്റ് ഫീച്ചറിന് രൂപം നൽകിയതെന്ന് വാട്ട്സ്ആപ്പ് അറിയിച്ചു. പേയ്മെന്റ് സേവനത്തിനായി വാട്ട്സ് ആപ്പിന്റെ ഏറ്റവും പുതിയ വേർഷൻ ആയിരിക്കണം ഡൗൺലോഡ് ചെയ്യേണ്ടത്.
ഇക്കഴിഞ്ഞ നവംബർ മാസത്തിലാണ് പേയ്മെന്റ് ഫീച്ചറുമായി മുന്നോട്ട് പോകാൻ വാട്ട്സ് ആപ്പിന് അനുമതി ലഭിക്കുന്നത്. രാജ്യത്തെ വിവിധ ഭാഗങ്ങളിലുള്ള ജനങ്ങൾക്ക് വാട്ട്സ് ആപ്പ് വഴി പണം അയക്കാം. വാട്ട്സ് ആപ്പ് വഴി പണമിടപാടുകൾ ഫേസ്ബുക്ക് ഉപഭോക്താക്കൾക്ക് സൗജന്യമായി നടത്താമെന്ന് മാർക്ക് സുക്കർബർഗ് നേരത്തെ അറിയിച്ചിരുന്നു. സന്ദേശം അയക്കുന്ന അതേ വേഗതയിൽ തന്നെ തികച്ചും സുരക്ഷിതമായും സ്വകാര്യമായും പണം അയക്കാൻ വാട്ട്സ് ആപ്പ് പേയ്മെന്റ് സംവിധാനം വഴി കഴിയും.
