ക്രിസ്തുമസ് കാലത്തെ വരവേല്ക്കുന്നതില് പ്രധാന പങ്കുവഹിക്കുന്ന ഒന്നാണ് ക്രിസ്തുമസ് കേക്കുകള്. ക്രിസ്തുമസ് അടുക്കുന്നതോടെ വ്യത്യസ്ത രീതിയിലുള്ള നിരവധി കേക്കുകള് വിപണി കീഴടക്കാനായി ഒരുങ്ങി കഴിഞ്ഞിരിക്കും. അവയില് ഏറ്റവും പ്രധാനപ്പെട്ട ഒന്നാണ് പ്ലം കേക്കുകള്. എന്നാല് കടകളില് നിന്നും ലഭിക്കുന്നതിലും ഗുണകരവും രുചികരവുമായ പ്ലം കേക്കുകള് എളുപ്പത്തില് വീട്ടില് തന്നെ തയ്യാറാക്കാവുന്നതാണ്. ഇതിനായി ഒരു കപ്പ് മൈദ, ഒരു ടീ സ്പൂണ് ബേക്കിംഗ് പൗഡര്, കാല് ടീസ്പൂണ് അപ്പക്കാരം, കാല് ടീസ്പൂണ് ജാതിക്കാ പൊടിച്ചത്, കാല് ടീസ്പൂണ് കറുവപ്പട്ട പൊടിച്ചത്, ഒരു നുളള് ഉപ്പും എന്നിവ ചേര്ത്ത് മൂന്നു പ്രാവശ്യം നന്നായി തിരിച്ചെടുക്കുക. കേക്ക് നല്ല സോഫ്റ്റ് ആയി കിട്ടുന്നതിനാണ് ഇങ്ങനെ ചെയ്യുന്നത്.
ഒരു കപ്പ് ഡ്രൈഫ്രൂട്ട്സ് എടുത്ത് അതിലേക്ക് അരിച്ചു വെച്ചിരിക്കുന്ന പൊടിയില് നിന്നും ഒരു സ്പൂണ് പൊടി ചേര്ത്ത് നന്നായി മിക്സ് ചെയ്ത് എടുക്കുക. കേക്ക് ഉണ്ടാക്കുമ്പോള് ഡ്രൈഫ്രൂട്ട്സ് അടിയില് പോയി നില്ക്കാതിരിക്കാനാണ് ഇങ്ങനെ ചെയ്യുന്നത്. അടുത്തതായി കാരമല് സിറപ്പ് തയ്യാറാക്കാം. ഇതിനായി ഒരു പാത്രത്തില് അര കപ്പ് പഞ്ചസാര ഇട്ട ശേഷം നന്നായി ചൂടാക്കി എടുക്കുക. ഇത് നല്ല ബ്രൗണ് നിറമായി കഴിഞ്ഞാല് ഇതിലേക്ക് ഒരു കപ്പ് വെള്ളം ഒഴിക്കുക. ഈ വെള്ളം തിളച്ച് കുറുകി വരുമ്പോള് തീ ഓഫ് ചെയ്ത് തണുക്കാനായി മാറ്റി വയ്ക്കുക.
ശേഷം മിക്സിയുടെ ജാറില് അര കപ്പ് പഞ്ചസാര, രണ്ട് കോഴിമുട്ട, കാല് ടീസ്പൂണ് വാനില എസന്സ്, കാല് കപ്പ് സണ്ഫ്ളവര് ഒയില്, തയ്യാറാക്കി വെച്ചിരിക്കുന്ന കാരമല് സിറപ്പ് എന്നിവ ഒഴിച്ചു കൊടുക്കുക. ശേഷം അരിച്ചു വെച്ചിരിക്കുന്ന മൈദയും ചേര്ത്ത് നന്നായി അടിച്ചെടുക്കുക. പിന്നീട് ഇതിലേക്ക് ഡ്രൈഫ്രൂട്ട്സ് ചേര്ത്ത് ഒന്നു അടിക്കുക. അതിനു ശേഷം കുക്കറിന്റെ അടിയല് എണ്ണ തൂവി മിക്സ് ഒഴിച്ചു കൊടുത്തു നന്നായി സെറ്റ് ചെയ്യുക. കുക്കറിന്റെ വിസല് ഊരിവെച്ച് 35 മിനിറ്റോളം സിമ്മില് വേവിക്കുക. പിന്നീട് തീ ഓഫ് ചെയ്ത് കേക്ക് പുറത്തെടുക്കാം. വളരെ സ്വാദിഷ്ടമായ പ്ലം കേക്ക് തയ്യാര്.
