ലണ്ടൻ: കൊറോണ വൈറസിന്റെ പുതിയ വകഭേദം ബ്രിട്ടനിൽ പ്രത്യക്ഷപ്പെട്ടതിന് ശേഷം ലോകമെമ്പാടും കനത്ത ജാഗ്രതയിലാണ്. ലോകത്തെ മുപ്പതിലധികം രാജ്യങ്ങൾ ബ്രിട്ടനിലേക്കുള്ള വിമാനസേവനം റദ്ദാക്കി. എന്നാൽ ബ്രിട്ടണിൽ സ്ഥിതി നിയന്ത്രണത്തിലാണെന്നും ആശങ്കപ്പെടേണ്ട സാഹചര്യമില്ലെന്നും ലോകാരോഗ്യ സംഘടന അറിയിച്ചു. പുതിയ കൊറോണ വൈറസ് കൂടുതൽ മാരകമാണെന്നതിന് ഇതുവരെ വ്യക്തമായ തെളിവുകളൊന്നും കണ്ടെത്തിയിട്ടില്ലെന്നും ലോകാരോഗ്യ സംഘടന പറഞ്ഞു.
നിലവിലെ സ്ഥിതി നമ്മുടെ നിയന്ത്രണത്തിന് അതീതമല്ലെന്ന് ലോകാരോഗ്യ സംഘടനയുടെ എമർജൻസി ചീഫ് മൈക്കൽ റയാൻ വ്യക്തമാക്കി. എങ്കിലും കാര്യങ്ങൾ സൂക്ഷമമായി നിരീക്ഷിച്ചുവരികയാണെന്നും അദ്ദേഹം വ്യക്തമാക്കി.
ബ്രിട്ടനിലെ സ്ഥിതി നിയന്ത്രണവിധേയമാക്കാൻ ലോക്ഡൗൺ പ്രഖ്യാപിച്ചു കഴിഞ്ഞു. വൈറസിന്റെ പുതിയ രൂപത്തെ നേരിടാൻ സർക്കാർ പ്രതിരോധ നടപടികൾ ആരംഭിച്ചുകഴിഞ്ഞുവെന്നും ബ്രിട്ടൻ ആരോഗ്യമന്ത്രി മാറ്റ് ഹാൻ‌കോക്ക് പറഞ്ഞു.
