മെൽബൺ: ആദ്യ ടെസ്റ്റിലെ മോശം പ്രകടനത്തിന്റെ പേരിൽ ടീം ഇന്ത്യയിൽ ഉടച്ചുവാർക്കലിനെതിരെ പ്രതികരിച്ച് മുൻ ഓസീസ് താരം. ടീം ഇന്ത്യയുടെ വിക്കറ്റ് കീപ്പർ സ്ഥാനം യുവതാരത്തിന് കൈമാറുന്നതുമായി നടക്കുന്ന ചർച്ചയെയാണ് ഓസീസ് താരം വിമർശിച്ചത്. ടീം ഇന്ത്യയിൽ ആദ്യ ടെസ്റ്റിൽ കളിച്ച വൃദ്ധിമാൻ സാഹ ബാറ്റിംഗിൽ പരാജയമായിരുന്നു. മദ്ധ്യനിരയിലിറങ്ങിയിട്ടും നാലും ഒൻപതുമാണ് എടുത്തത്. റൺസ് സ്കോർ ചെയ്യുന്നതിലെ ദാരിദ്ര്യം മാറ്റാൻ ഋഷഭ് പന്തിനെ പകരക്കാരനാക്കണമെന്ന ആവശ്യം ചർച്ചയായിട്ടുണ്ട്. ഇതിനെതിരെയാണ് മൈക്ക് ഹസ്സിയുടെ പ്രതികരണം.
സാഹ മികച്ച കീപ്പറാണ്. അയാളുടെ കളി നന്നായി കണ്ടിട്ടുമുണ്ട്. കീപ്പറുടെ ആവശ്യം നന്നായി കീപ്പ് ചെയ്യുക എന്നതാണ്. അതിനാണ് ഏതു ടീമും മുൻതൂക്കം നൽകേണ്ടത്. ബാറ്റിഗിന്റെ മികവ് നോക്കിയല്ല കീപ്പറെ തീരുമാനിക്കേണ്ടത്. മുമ്പൊക്കെ കീപ്പറെടുക്കുന്ന റൺസ് ഒരു ബോണസായിട്ടാണ് കണക്കാക്കാറെന്നും ഹസ്സി പറഞ്ഞു.
