മുംബൈ : കൊറോണ വൈറസ് വ്യാപനത്തിന്റെ ആദ്യഘട്ടത്തിൽ ‘ഗോ കൊറോണ ഗോ’എന്ന് പറഞ്ഞ കേന്ദ്ര മന്ത്രി രാംദാസ് അതാവലെ പുതിയ മുദ്രാവാക്യവുമായി രംഗത്ത്. ‘ നോ കൊറോണ നോ’ എന്ന മുദ്രാവാക്യമാണ് ജനങ്ങൾ ഇപ്പോൾ ഉപയോഗിക്കേണ്ടതെന്ന് അദ്ദേഹം പറഞ്ഞു. കൊറോണ വൈറസിന്റെ പുതിയ വകഭേദം വിവിധ രാജ്യങ്ങളിൽ കണ്ടെത്തിയതിന് പിന്നാലെയാണ് പുതിയ മുദ്രാവാക്യം അതാവലെ മുന്നോട്ടു വയ്‌ക്കുന്നത്.
ഗോ കൊറോണ ഗോ എന്ന മുദ്രാവാക്യം പുറത്തിറക്കിയതിന് പിന്നാലെ കൊറോണ വൈറസ് വ്യാപനം കുറഞ്ഞിരിക്കുകയാണ്. തനിക്ക് കൊറോണ രോഗം ബാധിക്കില്ലെന്നാണ് വിചാരിച്ചിരുന്നതെന്നും എന്നാൽ രോഗ ബാധയെത്തുടർന്ന ആശുപത്രിയിൽ പ്രവേശിക്കേണ്ടിവന്നു എന്നും അദ്ദേഹം പറഞ്ഞു. കൊറോണ വൈറസിന്റെ പുതിയ വകഭേദം കണ്ടെത്തിയതായി റിപ്പോർട്ടുകൾ പുറത്തുവന്നിരുന്നു. ഈ സാഹചര്യത്തിൽ എല്ലാവരും ‘നോ കൊറോണ നോ’ എന്ന മുദ്രാവാക്യമാണ് ഉച്ചരിക്കേണ്ടതെന്ന് അദ്ദേഹം അറിയിച്ചു.
കഴിഞ്ഞ ഫെബ്രുവരിയിലാണ് കൊറോണ വ്യാപനം കുറയ്‌ക്കാനായി മുംബൈയിൽ പ്രാർത്ഥന യോഗം നടന്നത്. ഗേറ്റ് വെ ഓഫ് ഇന്ത്യയിൽ സംഘടിപ്പിച്ച പ്രാർത്ഥന യോഗത്തിലാണ് അതാവലെ ‘ഗോ കൊറോണ ഗോ’ എന്ന് ആദ്യമായി ഉരുവിട്ടത്. യോഗത്തിൽ ബുദ്ധസന്യാസിമാരും ചൈനീസ് നയതന്ത്രപ്രതിനിധിയും പങ്കെടുത്തിരുന്നു. തുടർന്ന് അതാവലെയുടെ വീഡിയോ സമൂഹമാദ്ധ്യമങ്ങളിൽ ശ്രദ്ധ നേടുകയും ചെയ്തു.
