മുംബൈ: ദാമ്പത്യ തർക്കത്തെത്തുടർന്നുണ്ടായ മാനസിക സമ്മർദ്ദത്തെ കുറിച്ച് 13 മിനിറ്റ് ദൈർഘ്യമുള്ള വീഡിയോ സന്ദേശം റെക്കോർഡ് ചെയ്ത ഗുജറാത്ത് സ്വദേശിയായ യുവാവ് മഹാരാഷ്‌ട്രയിൽ മരിച്ച നിലയിൽ. ഭാവ്നഗർ സ്വദേശിയും തപാൽവകുപ്പ് ജീവനക്കാരനുമായ വിശ്വരാജ്‌സിൻഹ് മയൂർസിങ് ഗോഹിലാണ് ഒക്ടോബർ 12-ന് ഹരിശ്ചന്ദ്രഗഡിലെ കൊങ്കൺകഡയിൽ മരിച്ചത്. ഭാര്യയുമായുള്ള തർക്കങ്ങളും തുടർന്നുണ്ടായ നിയമനടപടികളും തനിക്ക് വലിയ മാനസിക സമ്മർദമുണ്ടാക്കിയെന്ന് വീഡിയോയിൽ അദ്ദേഹം ആരോപിച്ചിരുന്നു. സംഭവത്തിൽ പൊലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചു.
എട്ടുമാസം മാത്രം നീണ്ട ദാമ്പത്യം
ഈ വർഷം ഫെബ്രുവരി എട്ടിനായിരുന്നു വിശ്വരാജിന്റെയും ഭാര്യയുടെയും വിവാഹം. എന്നാൽ, ഇരുവർക്കുമിടയിലെ തർക്കങ്ങൾ രൂക്ഷമായതോടെ ബന്ധത്തിൽ പ്രശ്നങ്ങൾ ഉടലെടുത്തു. സെപ്റ്റംബർ 12-ന് ഭാര്യ ഗാർഹിക പീഡനം ആരോപിച്ച് പൊലീസിൽ പരാതി നൽകി. ഇതുമായി ബന്ധപ്പെട്ട കേസിൽ ഒക്ടോബർ ഒൻപതിന് വിശ്വരാജ് കോടതിയിൽ ഹാജരായിരുന്നു.
ദാമ്പത്യ ബന്ധത്തിലെ തർക്കങ്ങളും തുടർന്നുണ്ടായ നിയമനടപടികളും തന്നെ മാനസികമായും സാമ്പത്തികമായും സാമൂഹികമായും തളർത്തിയെന്നാണ് വീഡിയോയിൽ വിശ്വരാജ് പറഞ്ഞത്. തനിക്കും കുടുംബാംഗങ്ങൾക്കുമെതിരെ ഉയർന്ന ആരോപണങ്ങൾ തെറ്റാണെന്നും അദ്ദേഹം പറഞ്ഞു.
ഭാര്യയെ സ്വന്തം വീട്ടിൽനിന്ന് അവരുടെ മാതാപിതാക്കൾ നിർബന്ധിച്ച് കൊണ്ടുപോയതായും സ്വർണാഭരണങ്ങളുമായി ബന്ധപ്പെട്ട തർക്കങ്ങളുണ്ടായതായും അദ്ദേഹം പറയുന്നുണ്ട്. കുടുംബത്തിലെ മറ്റുള്ളവരെയും കേസിൽ ഉൾപ്പെടുത്തിയതിൽ ആശങ്ക പ്രകടിപ്പിച്ച വിശ്വരാജ്, തന്റെ മാതാപിതാക്കളുടെയും 16 വയസ്സുള്ള അനുജന്റെയും ഭാവിയെക്കുറിച്ചും വീഡിയോയിൽ പരാമർശിച്ചു.
വിവാഹബന്ധങ്ങളിലെ തർക്കങ്ങളുമായി ബന്ധപ്പെട്ട നിയമനടപടികൾ പുരുഷന്മാരുടെ മാനസികാവസ്ഥയെയും കുടുംബജീവിതത്തെയും എങ്ങനെ ബാധിക്കുന്നുവെന്ന് അധികൃതർ പരിശോധിക്കണമെന്ന് വിശ്വരാജ് വീഡിയോയിലൂടെ ആവശ്യപ്പെട്ടു. ഐപിസി 498എ വകുപ്പുമായി ബന്ധപ്പെട്ട കേസുകളിൽ 90 മുതൽ 92 ശതമാനം വരെ വ്യാജമാണെന്ന കണക്കും അദ്ദേഹം വീഡിയോയിൽ ഉന്നയിച്ചു.
വീഡിയോ പരിശോധിച്ച് പൊലീസ്
സംഭവവുമായി ബന്ധപ്പെട്ട് പൊലീസ് അസ്വാഭാവിക മരണ റിപ്പോർട്ട് (Accidental Death Report) രജിസ്റ്റർ ചെയ്തിട്ടുണ്ട്. യുവാവിന്റെ മരണത്തിന് മുമ്പുള്ള വീഡിയോ, കുടുംബാംഗങ്ങളുടെ മൊഴികൾ, വൈവാഹിക തർക്കവുമായി ബന്ധപ്പെട്ട പരാതികൾ എന്നിവ പരിശോധിച്ചുവരികയാണെന്ന് പൊലീസ് അറിയിച്ചു.
