മോഹന്ലാല് പ്രിയദര്ശന് കൂട്ടുകെട്ടില് ഒരുങ്ങിയ മരയ്ക്കാര് അറബികടലിന്റെ സിംഹം എന്ന ചിത്രം 2021 മാര്ച്ച് 26 ന് തിയേറ്ററുകളിലെത്തും. മലയാള സിനിമയിലെ തന്നെ ഏറ്റവും ചിലവേറിയ ഈ ചിത്രത്തിന്റെ ആകെ ബജറ്റ് 100 കോടിയാണ്. നിരവധി ഭാഷകളില് പുറത്തിറങ്ങുന്ന ഈ മോഹന്ലാല് ചിത്രത്തിനായി ആരാധകര് പ്രതീക്ഷയോടെ കാത്തിരിക്കുകയാണ്. കുഞ്ഞാലി മരയ്ക്കാര് നാലാമനായിട്ടാണ് മോഹന്ലാല് ചിത്രത്തില് എത്തുന്നത്. താരത്തെ കൂടാതെ മഞ്ജു വാര്യര്, കീര്ത്തി സുരേഷ്, സുനില് ഷെട്ടി, അര്ജ്ജുന് സര്ജ, പ്രഭു, മുകേഷ്, സിദ്ദിഖ് തുടങ്ങി വന് താരനിര തന്നെ ഈ ചിത്രത്തില് അണിനിരക്കുന്നു. പ്രിയദര്ശന്, അനി ശശി എന്നിവര് ചേര്ന്നാണ് ചിത്രത്തിന്റെ കഥയും തിരക്കഥയും ഒരുക്കിയത്.
ആശിര്വാദ് സിനിമാസ്, മൂണ്ഷൂട്ട് എന്റ്റര്ടൈന്മെന്ന്റ്, കോണ്ഫിഡന്ഡ് ഗ്രൂപ്പ് എന്നീ ബാനറുകളില് ആന്റണി പെരുമ്പാവൂര്, സന്തോഷ്.ടി കുരുവിള, റോയ്.സി.ജെ എന്നിവര് ചേര്ന്നാണ് ചിത്രം നിര്മ്മിച്ചത്. എസ്സ്.തിരു ഛായാഗ്രഹണവും എം.എസ്സ്.അയ്യപ്പന് നായര് എഡിറ്റിംഗും നിര്വ്വഹിച്ചു. റോണി റാഫേല് സംഗീത സംവിധാനം നിര്വ്വഹിച്ച ഈ ചിത്രത്തിന് പശ്ചാത്തല സംഗീതം നല്കിയത് രാഹുല് രാജും, അങ്കിത് സൂരിയും ലൈല് ഇവാന്സ് റോഡറും ചേര്ന്നാണ്.
ലോകത്ത് പടര്ന്നു പിടിച്ച കൊറോണ വൈറസിന്റെ പശ്ചാത്തലത്തില് 2020 മാര്ച്ച് 26-ന് റിലീസ് തീരുമാനിച്ചിരുന്ന ചിത്രത്തിന്റെ റിലീസ് മാറ്റിവയ്ക്കുകയായിരുന്നു. തീയറ്ററുകളിലെത്താന് ആരാധകര് ഏറെ കാത്തിരുന്ന മോഹന്ലാല് ചിത്രമായിരുന്നു ജിത്തു ജോസഫ് സംവിധാനം ചെയ്ത ദൃശ്യം 2 എന്ന ചിത്രം. എന്നാല് വലിയ ബജറ്റില് നിര്മ്മിച്ച മരയ്ക്കാര് എന്ന ചിത്രം വലിയ സ്ക്രീനിലൂടെ പ്രേക്ഷകരിലേക്ക് എത്തിക്കണം എന്നതിനാല് ദൃശ്യം 2 ഒടിടി പ്ളാറ്റ്ഫോമിലൂടെ റിലീസ് ചെയ്യാന് തീരുമാനിച്ചു.
