മുംബൈ: ഓസീസ് മണ്ണിൽ പരമ്പര വിജയം നേടിയ ഇന്ത്യൻ ടീമിനെ അഭിനന്ദിച്ച് ക്രിക്കറ്റ് ഇതിഹാസം സച്ചിൻ ടെണ്ടുൽക്കർ. ടെസ്റ്റ് ചരിത്രത്തിലെ ഇന്ത്യയുടെ ഏറ്റവും ചെറിയ സ്‌കോറായ 36 റൺസ് എടുത്ത നിമിഷം ഓർമ്മിപ്പിച്ചുകൊണ്ടായിരുന്നു ചരിത്ര വിജയത്തിൽ സച്ചിൻ സന്തോഷം പങ്കുവെച്ചത്.
‘നമ്മളോടും ഒപ്പം ലോകത്തോട് മുഴുവനും, ജീവിതത്തിൽ നിങ്ങൾ എപ്പോഴെങ്കിലും 36 അല്ലെങ്കിൽ അതിൽ കുറവ് സ്‌കോർ ചെയ്യുകയാണെങ്കിൽ, ഓർമ്മിക്കുക: അത് ലോകാവസാനമല്ല. നിങ്ങളെ മുന്നോട്ട് നയിക്കാൻ മാത്രമാണ് സ്പ്രിംഗ് പിന്നിലേക്ക് വലിയുന്നത്. വിജയിച്ചു കഴിഞ്ഞാൽ, ലോകം നിങ്ങളെ എഴുതിത്തള്ളിയപ്പോൾ ഒപ്പം നിന്നവരുമായി ആഘോഷിക്കാൻ നിങ്ങൾ മറക്കരുത്’. സച്ചിൻ ട്വിറ്ററിൽ കുറിച്ചു.
സച്ചിനു പുറമെ ഇന്ത്യൻ ടീമിലെ നിരവധി മുൻ താരങ്ങൾ അഭിനന്ദനവുമായി രംഗത്തെത്തി. ഓസ്‌ട്രേലിയയിൽ പോയി ഈ രീതിയിൽ പരമ്പര സ്വന്തമാക്കുകയെന്നത് ചരിത്രമാണെന്നായിരുന്നു മുൻ ഇന്ത്യൻ നായകനും നിലവിൽ ബിസിസിഐ അദ്ധ്യക്ഷനുമായ സൗരവ് ഗാംഗുലിയുടെ പ്രതികരണം. അഭിമാന നിമിഷമെന്ന് ഹർഭജൻ സിംഗും വിവിഎസ് ലക്ഷ്മണും പ്രതികരിച്ചു. സുരേഷ് റെയ്‌ന, അനിൽ കുംബ്ലെ, വിരാട് കോഹ്‌ലി, ദിനേശ് കാർത്തിക്, ശ്രേയസ് അയ്യർ, ശിഖർ ധവാൻ, ഇഷാന്ത് ശർമ്മ എന്നിങ്ങനെ നിരവധിയാളുകളാണ് ടീം ഇന്ത്യയ്‌ക്ക് അഭിനന്ദനവുമായി രംഗത്തെത്തിയത്.
