ന്യൂഡൽഹി: ദാരിദ്ര്യ രേഖയ്ക്ക് താഴെയുള്ള കുടുംബങ്ങളിലെ ഒരു കോടി സ്ത്രീകൾക്ക് കൂടി പാചകവാതകം സൗജന്യമായി നൽകുമെന്ന് ബജറ്റ് പ്രഖ്യാപനം. ഉജ്ജ്വല യോചന പ്രകാരം വീടുകളിൽ പ്രകൃതി വാതകം എത്തിക്കുന്ന സിറ്റി ഗ്യാസ് പദ്ധതി അടുത്ത വർഷം കൊണ്ട് 100 ജില്ലകളിലേക്ക് വ്യാപിപ്പിക്കുമെന്ന് ധനമന്ത്രി നിർമ്മല സീതാരാമൻ അറിയിച്ചു.
പാചക ആവശ്യത്തിനായുള്ള വാതകം പൈപ്പ് വഴി അടുക്കളയിൽ എത്തിക്കുന്ന പദ്ധതിയാണ് സിറ്റിഗ്യാസ് പദ്ധതി. എൽപിജിയെക്കാൾ അപകട സാദ്ധ്യത കുറവാണ് എന്നതാണ് പ്രധാന ആകർഷണം. സുരക്ഷിതവും ചെലവുകുറവുമായ സിറ്റി ഗ്യാസ് പദ്ധതി വർദ്ധിപ്പിക്കും. മണ്ണിൽ കുഴിച്ചിട്ട പൈപ്പ് വഴിയാണ് അടുക്കളയിൽ വാതകം എത്തിയ്ക്കുക.
പദ്ധതി കേരളം മുഴുവൻ വ്യാപിപ്പിക്കാൻ നേരത്തെ തീരുമാനിച്ചിരുന്നു. ഊർജ മേഖലയ്ക്ക് 3.05 ലക്ഷം കോടി രൂപയും സർക്കാർ ബാങ്കുകളുടെ പുനർമൂലധനത്തിനായി 20000 കോടി രൂപയും പ്രഖ്യപിച്ചു.
