ബംഗളൂരു: രാജ്യത്തിന്റെ ആകാശക്കരുത്ത് തെളിയിച്ച് എയ്റോ ഇന്ത്യ 2021 ന് പ്രൗഢ ഗംഭീരമായ തുടക്കം . യെലഹങ്ക എയർ ഫോഴ്സ് പരേഡ് ഗ്രൗണ്ടിൽ നടന്ന പരിപാടി പ്രതിരോധ മന്ത്രി രാജ്നാഥ് സിംഗ് ഉദ്ഘാടനം ചെയ്തു . കർണാടക മുഖ്യമന്തി ബി.എസ് യെദ്യൂരപ്പ , സംയുക്ത സേന മേധാവി ജനറൽ ബിപിൻ റാവത്ത് . കരസേന മേധാവി ജനറൽ മനോജ് മുകുന്ദ് നരവാനേ , വ്യോമസേന മേധാവി എയർ ചീഫ് മാർഷൽ ആർ.കെ. എസ് ബധൂരിയ , നാവിക സേന മേധാവി അഡ്മിറൽ കരംബീർ സിംഗ് തുടങ്ങിയ പ്രമുഖർ ചടങ്ങിൽ പങ്കെടുത്തു.
83 തേജസ് മാർക്ക് 1 A പോർവിമാനങ്ങൾ വാങ്ങാനുള്ള കരാർ പ്രതിരോധ മന്ത്രി ഔദ്യോഗികമായി ഹിന്ദുസ്ഥാൻ എയറോനോട്ടിക് സിന് കൈമാറി. 48,000 കോടിയുടെ കരാർ ആണ് കൈമാറിയത് . ഇന്ത്യയുടെ ചരിത്രത്തിലെ ഏറ്റവും വലിയ തദ്ദേശീയ കരാറാണിതെന്ന് പ്രതിരോധ മന്ത്രി ചൂണ്ടിക്കാട്ടി. അഖണ്ഡതയ്ക്കും പരമാധികാരത്തിനുമെതിരെയുള്ള ഏത് നീക്കവും പ്രതിരോധിച്ച് പരാജയപ്പെടുത്താനുള്ള കഴിവ് ഇന്ത്യയ്ക്കുണ്ട് , എന്തും നേരിടാൻ ഇന്ത്യ തയ്യാറാണെന്നും പ്രതിരോധ മന്ത്രി പറഞ്ഞു.
ഏഷ്യയിലെ ഏറ്റവും വലിയ സൈനിക വ്യോമ പ്രദർശനത്തിന് വേദിയാവുകയാണ് ബംഗളൂരു. എയ്റോ ഇന്ത്യ 2021 ന് ബംഗളൂരുവിലെ യെലഹങ്ക എയർഫോഴ്സ് സ്റ്റേഷനിൽ ബുധനാഴ്ച തുടക്കമാകും. രാവിലെ 9:30 ന് പ്രതിരോധ മന്ത്രി രാജ്നാഥ് സിംഗ് വ്യോമപ്രദർശനം ഉദ്ഘാടനം ചെയ്യും. തുടർന്ന് രാജ്യത്തിന്റെ ആകാശക്കരുത്ത് കാട്ടി പോർവിമാനങ്ങളുടെ പ്രദർശനം ഉണ്ടാകും. ഫെബ്രുവരി അഞ്ച് വരെയാണ് പരിപാടി.
കൊറോണയുടെ പശ്ചാത്തലത്തിൽ ഇക്കുറി പകിട്ട് കുറവാണെങ്കിലും പ്രതിരോധ നിക്ഷേപ മേഖലയിൽ ആത്മവിശ്വാസം പകരുന്നതാകും പരിപാടി. കൊറോണ മാനദണ്ഡങ്ങൾ പൂർണമായി പാലിച്ചാണ് പരിപാടി നടത്തുന്നത്. മാദ്ധ്യമപ്രവർത്തകർ ഉൾപ്പടെ കൊറോണ നെഗറ്റീവ് സർട്ടിഫിക്കറ്റ് ഹാജരാക്കണമന്ന് നിർദ്ദേശിച്ചിരുന്നു. കൊറോണ വ്യാപനം വിദേശ കമ്പനികളുടെ പ്രാതിനിധ്യം കുറച്ചിട്ടുണ്ട്. എന്നാൽ ആത്മനിർഭർ ഭാരത് ഉൾപ്പെടെയുളള കേന്ദ്രസർക്കാർ പദ്ധതികളിലൂടെ പ്രതിരോധ ഉപകരണ നിർമാണ മേഖലയിൽ കൂടുതൽ സാന്നിധ്യം അറിയിച്ച ഹിന്ദുസ്ഥാൻ എയ്റോനോട്ടിക്സ് ലിമിറ്റഡ്, ഭാരത് ഇലക്ട്രോണിക്സ് ലിമിറ്റഡ് തുടങ്ങിയവയുടെ സാന്നിധ്യം ശ്രദ്ധേയമാകും.
വിമാനങ്ങളുടെ പ്രദർശനത്തിൽ വ്യോമസേനയുടെ ആധിപത്യമാകും ദൃശ്യമാകുക. സേനാ വിമാനങ്ങളും അനുബന്ധ ഉപകരണങ്ങളും പരിചയപ്പെടാനും അടുത്തറിയാനുമുളള വേദി കൂടിയാണ് എയ്റോ ഇന്ത്യ. ആത്മനിർഭർ ഭാരത് പദ്ധതിയുടെ പിൻബലത്തിൽ വികസിപ്പിച്ച 30 ഓളം ഉൽപ്പന്നങ്ങൾ പ്രദർശനത്തിൽ അവതരിപ്പിക്കുമെന്ന് ഭാരത് ഇലക്ട്രോണിക്സ് ലിമിറ്റഡ് വ്യക്തമാക്കി. പ്രതിരോധ ആവശ്യങ്ങൾക്കുളള ആശയവിനിമയ, ലേസർ അധിഷ്ഠിത ഉപകരണങ്ങൾ ഉൾപ്പെടെ ഇതിൽ ഉൾപ്പെടും. ബഹിരാകാശ, ഉപഗ്രഹ, സ്പെയ്സ് ആപ്ലിക്കേഷൻ ഉപകരണങ്ങളും കമ്പനി അണിനിരത്തുന്നുണ്ട്.
ലൈറ്റ് യൂട്ടിലിറ്റി ഹെലികോപ്ടറുകളും ലൈറ്റ് കോംപാക്ട് ഹെലികോപ്ടറുകളുമാകും ഹിന്ദുസ്ഥാൻ എയ്്റോനോട്ടിക്സ് ലിമിറ്റഡ് അവതരിപ്പിക്കുക. ഏകദേശം അറുനൂറോളം കമ്പനികൾ അവരുടെ ഉപകരണങ്ങൾ എയ്റോ ഇന്ത്യയിൽ പ്രദർശിപ്പിക്കും. ഇതിൽ 78 എണ്ണം വിദേശ കമ്പനികളാണ്. റഫേലിന്റെ നിർമ്മാതാക്കളായ ദെസ്സോ, പ്രമുഖ കമ്പനികളായ ബോയിംഗ് , ലോക്ക് ഹീഡ് മാർട്ടിൻ തുടങ്ങിയവ വ്യോമ പ്രദർശനത്തിൽ പങ്കെടുക്കും.
