ദുബായ്: ഇംഗ്ലണ്ടിനെതിരെ രണ്ടാം ടെസ്റ്റിൽ ഇന്ത്യ നേടിയ ഗംഭീരജയം താരങ്ങ ളുടെ റാങ്കിംഗും മെച്ചപ്പെടുത്തി. ബാറ്റ്കൊണ്ടും പന്തുകൊണ്ടും നടത്തിയ പ്രകടനം അശ്വിനെ ഓൾറൗണ്ടർ എന്ന സ്ഥാനത്തേക്ക് ഉയർത്തിയതാണ് പ്രധാന നേട്ടം. ബാറ്റിംഗിൽ ആദ്യ ടെസ്റ്റിൽ നിറംമങ്ങിയ രോഹിത് ശർമ്മയുടെ രണ്ടാം ടെസ്റ്റിലെ തിരിച്ചുവരവ് റാങ്കിംഗിലും നേട്ടമായി. ബാറ്റിംഗിലെ മികവിൽ ഋഷഭ് പന്തും നില മെച്ചപ്പെടുത്തി. ഐ.സി.സിയുടെ ടെസ്റ്റ് റാങ്കിംഗിലാണ് ഇന്ത്യൻ താരങ്ങളെല്ലാം നില മെച്ചപ്പെടുത്തിയത്. ഇംഗ്ലണ്ടിനെതിരെ 317 റൺസിന്റെ ജയം നേടിയത് മുൻനിരതാരങ്ങൾക്കും വാലറ്റത്തിനും ഒരു പോലെയാണ് ഗുണമായത്.
161 റൺസ് നേടിയ രോഹിത് ശർമ്മ ബാറ്റിംഗിൽ 9 സ്ഥാനങ്ങൾ കയറി 14-ാം സ്ഥാനത്തേക്ക് എത്തി. 2019 നവംബറിന് ശേഷമാണ് രോഹിത് ഭേദപ്പെട്ട റാങ്കിംഗിലേക്ക് ഉയരുന്നത്. ഇതിന് മുമ്പ് 10-ാം സ്ഥാനത്തേക്ക് ഉയർന്നതാണ് രോഹിതിന്റെ സർവ്വകാല നേട്ടം.
ക്രിക്കറ്റ് ജീവിതത്തിലെ ഏറ്റവും മികച്ച ഓൾറൗണ്ടർ പ്രകടനം നടത്തിയാണ് അശ്വിൻ സ്വന്തം നാട്ടിൽ ഹീറോ ആയത്. ഓൾറൗണ്ടർമാരുടെ ലിസ്റ്റിൽ അശ്വിൻ അഞ്ചാം സ്ഥാനത്തേക്കാണ് ഉയർന്നിരിക്കുന്നത്. രവീന്ദ്ര ജഡേജ രണ്ടാം സ്ഥാനത്തുണ്ട്. ബാറ്റ്സ്മാൻമാരിൽ അശ്വിൻ 14 സ്ഥാനം മെച്ചപ്പെടുത്തി 81-ാം റാങ്കിലെത്തി. ബൗളർമാരിൽ അശ്വിൻ 7-ാം സ്ഥാനത്ത് തുടരുകയാണ്. വിക്കറ്റ് കീപ്പർ ബാറ്റ്സ്മാനായി തിളങ്ങിയ ഋഷഭ് പന്ത് സർവ്വകാല നേട്ടമായ 11-ാം റാങ്കിലെത്തി യപ്പോൾ അക്സർ പട്ടേൽ ബൗളിംഗ് മികവിൽ 68-ാം സ്ഥാനത്തെത്തി.
Comments