ന്യൂയോർക്ക്: ആഗോളതലത്തിലെ മുഴുവൻ അതിർത്തികളിലും അടിയന്തിരമായി വെടിനിർത്തൽ പ്രഖ്യാപിക്കണമെന്ന് ഐക്യരാഷ്‌ട്ര സെക്യൂരിറ്റി കൗൺസിൽ. മറ്റെല്ലാ ശത്രുതയും മറന്ന് കൊറോണ പ്രതിരോധത്തിനായി രാജ്യങ്ങളൊന്നിക്കണമെന്നും ഐക്യരാഷ്ട്രസഭ സുരക്ഷാ കൗൺസിൽ ആഹ്വാനം ചെയ്തു. രാജ്യാന്തര തലത്തിലെ ഭിന്നതകളെല്ലാം മാനുഷിക മൂല്യങ്ങളെ സംരക്ഷിക്കാനായി ഉപേക്ഷിക്കാനാണ് 15 അംഗ കൗൺസിലിന്റെ ആഹ്വാനം. 2656-ാമത് പ്രമേയമാണ് കൊറോണ പ്രതിരോധത്തിനായി വെടിനിർത്തലാഹ്വാനമായി മാറിയത്.
കടുത്ത അതിർത്തി പ്രശ്‌നങ്ങളും ആഭ്യന്തര കലാപങ്ങളും നിലനിൽക്കുന്ന പ്രദേശത്ത് വാക്‌സിനുകൾ വിതരണം ചെയ്യാനെടുത്ത തീരുമാനം സുരക്ഷാ കൗൺസിൽ സ്വാഗതം ചെയ്തു. ദരിദ്രരാജ്യങ്ങൾക്ക് പരമാവധി വാക്‌സിനെത്തിക്കാൻ മറ്റെല്ലാ രാജ്യങ്ങളും ചേർന്ന് ഫണ്ട് സ്വരൂപിക്കണമെന്നും പ്രമേയം ആഹ്വാനം ചെയ്തു. അഭയാർത്ഥികൾ ധാരാളമുള്ള പ്രദേശത്ത് യു.എൻ സംഘത്തിന്റെ നേതൃത്വത്തിൽ വാക്‌സിൻ വിതരണം അടിയന്തിരമായി ആരംഭിക്കണെന്നും കൗൺസിൽ തീരുമാനിച്ചു.
2001ൽ അഫ്ഗാനിസ്ഥാനിലെ സംഘർഷ സമയത്ത് പോലും പോളിയോ വാക്‌സിൻ വിതരണ ത്തിനായി ഒരാഴ്ച വെടിനിർത്തൽ പ്രഖ്യാപിച്ചത് സഭ ഓർമ്മിപ്പിച്ചു. ആ യജ്ഞത്തിൽ 35000 ആരോഗ്യപ്രവർത്തകർ പരിശ്രമിച്ചതിനെ തുടർന്ന് 57 ലക്ഷം കുട്ടികളിലേക്ക് വാക്‌സിനെ ത്തിയെന്നും യോഗം വിലയിരുത്തി.
