ന്യൂഡൽഹി: സമൂഹമാദ്ധ്യമ ലോകത്ത് നിന്നും തൽക്കാലം വിട്ടുനിൽക്കാൻ തീരുമാനി ച്ചതായി ഇന്ത്യൻ ഗുസ്തി താരം ഒളിമ്പ്യൻ ബജരംഗ് പൂനിയ. തന്റെ ലക്ഷ്യം ഇന്ത്യക്കായി ടോക്കിയോ ഒളിമ്പിക്‌സിൽ സ്വർണ്ണം നേടുക എന്നതാണ്. അതിനായി കടുത്ത പരിശീലനം നടത്തുകയാണ്. തന്റെ ആരാധകരും തനിക്കായി പ്രാർത്ഥിക്കണമെന്നും പൂനിയ അഭിപ്രായപ്പെട്ടു.
‘ഞാനിന്ന് മുതൽ എന്റെ സമൂഹമാദ്ധ്യമങ്ങളിലെ പേജുകളിൽ നിന്നും താൽക്കാലികമായി പിൻവാങ്ങുന്നു. ഇനി ശ്രദ്ധമുഴുവൻ ടോക്കിയോ ഒളിമ്പിക്‌സിലായിരിക്കും. നിങ്ങളുടെ യൊക്കെ സ്‌നേഹം എനിക്കൊപ്പമുണ്ടാകുമെന്ന് പ്രത്യാശിക്കുന്നു. ജയ്..ഹിന്ദ് ‘ പൂനിയ അവസാനമായി തന്റെ ട്വിറ്ററിൽ കുറിച്ചു.
ഇന്ത്യയ്‌ക്കായി 65 കിലോ ഗ്രാം വിഭാഗത്തിലാണ് പൂനിയ ഇറങ്ങുന്നത്. ഹരിയാന സ്വദേശിയായ പൂനിയ പരമ്പരാഗതമായി ഗുസ്തി പരിശീലിക്കുന്ന കുടുംബത്തിലെ അംഗമാണ്.നിലവിൽ ഇന്ത്യൻ റെയിൽവേ ഉദ്യോഗ്സ്ഥനെന്ന ഔദ്യോഗിക ചുമതലയും വഹിക്കുന്നുണ്ട്. ഒളിമ്പിക്‌സിൽ ഇതുവരെ മെഡലുകൾ നേടിയിട്ടില്ല. ലോക ഗുസ്തി ചാമ്പ്യൻഷിപ്പിൽ വെള്ളി നേടിയിട്ടുണ്ട്. ഏഷ്യൻ ഗെയിംസിലും കോമൺവെൽത്ത് ഗെയിംസിലും സ്വർണ്ണമെഡൽ ജേതാവാണ് ബദരംഗ് പൂനിയ.
