ചെന്നൈ: നടിയും ബിജെപി നേതാവുമായ ഖുശ്ബുവിന് 40.96 കോടിയുടെ സ്വത്തുക്കൾ. 34.56 കോടിയുടെ സ്ഥാവര സ്വത്തുക്കളും 6.39 കോടിയുടെ ജംഗമ വസ്തുക്കളും താരത്തിനുണ്ട്. ചെന്നൈയിൽ തൗസന്റ് ലൈറ്റ്‌സ് നിയമസഭ മണ്ഡലത്തിൽ നിന്നും മത്സരിക്കുന്ന ഖുശ്ബു നാമനിർദ്ദേശ പത്രികയോടൊപ്പം സമർപ്പിച്ച സത്യവാങ്മൂലത്തിലാണ് ഇക്കാര്യങ്ങൾ വെളിപ്പെടുത്തിയത്.
ഖുശ്ബുവിന്റെ പക്കൽ 1068 പവൻ സ്വർണവും 78 കിലോ വെള്ളിയുമുണ്ട്. ഭർത്താവ് സുന്ദറിന്റെ കൈവശം 495 ഗ്രാം സ്വർണവും ഒൻപത് കിലോ വെള്ളിയുമുണ്ടെന്ന് സത്യവാങ്മൂലത്തിൽ പറയുന്നു. 1.51 കോടിയാണ് വാർഷിക വരുമാനം. എട്ടാം ക്ലാസ് വരെയാണ് വിദ്യാഭ്യാസ യോഗ്യത. വ്യാഴാഴ്ചയാണ് ഖുശ്ബു സുന്ദർ നാമനിർദേശ പത്രിക സമർപ്പിച്ചത്.
3.45 കോടിയുടെ കടബാദ്ധ്യതയും ഭർത്താവിന് 5.55 കോടിയുടെ കടബാദ്ധ്യതയും ഉണ്ടെന്നും സത്യവാങ്മൂലത്തിൽ വ്യക്തമാക്കുന്നു. നാല് കേസുകൾ താരത്തിനെതിരെ നിലനിൽക്കുന്നുണ്ട്. ആറുവർഷമായി കോൺഗ്രസുമായുള്ള ബന്ധം അവസാനിപ്പിച്ച ശേഷം കഴിഞ്ഞ ഒക്ടോബറിൽ ബിജെപിയിൽ ചേർന്ന ഖുശ്ബുവിന് തെലങ്കാന, ഉദഗമണ്ഡലം എന്നിവിടങ്ങളിൽ സ്വന്തമായി കെട്ടിടങ്ങളുമുണ്ട്.
