പെരുമ്പാമ്പ് ചെറിയ ജീവികളെ വിഴുങ്ങുന്നത് സാധാരണമാണ്. എന്നാല്‍ ഇപ്പോള്‍ വൈറലായി കൊണ്ടിരിക്കുന്നത് മൂന്ന് വളര്‍ത്തു പൂച്ചകളെ ഒറ്റയടിക്ക് അകത്താക്കിയ ശേഷം വിശ്രമിക്കുന്ന പെരുമ്പാമ്പിന്റെ ദൃശ്യമാണ്. തായ്ലാന്‍ഡിലെ സാറാംമ്പൂരി പ്രവിശ്യയിലുള്ള മുപ്പത്തിയാറു കാരിയായ കനിത തേപ്തിതിന്റെ വീട്ടിലാണ് സംഭവം നടന്നത്. വീടിന്റെ രണ്ടാം നിലയിലുള്ള കിടപ്പു മുറിയിലുളള ജനലിലൂടെ പുറത്തോട്ട് നോക്കിയപ്പോഴാണ് പെരുമ്പാമ്പ് കനിത തേപ്തിതിന്റെ ശ്രദ്ധയില്‍ പെട്ടത്. വീടിന്റേയും ഭിത്തിയുടേയും ഇടയിലുള്ള സ്ഥലത്ത് വിശ്രമിക്കുകയായിരുന്നു കൂറ്റന്‍ പെരുമ്പാമ്പ്.
ഇരകളെ വിഴുങ്ങിയ ശേഷം ഒന്ന് അനങ്ങാന്‍ പോലും സാധിക്കാതെ കിടക്കുകയായിരുന്നു കറുത്ത നിറത്തിലുള്ള ഈ കൂറ്റന്‍ പെരുമ്പാമ്പ്. കറുത്ത നിറത്തിലുള്ള ഒരു വസ്തു അനങ്ങാതെ കിടക്കുന്നത് ശ്രദ്ധയില്‍ പെട്ടതോടെ താഴെ വന്ന് പരിശോധിച്ചപ്പോഴാണ് ഇരയെ വിഴുങ്ങി അനങ്ങാന്‍ പ്രയാസപ്പെടുന്ന കൂറ്റന്‍ പെരുമ്പാമ്പാണ് ഇതൊന്ന് കനിത തേപ്തിതിന് മനസ്സിലായത്. പെരുമ്പാമ്പിനെ കണ്ട ഉടനെ തന്നെ അവര്‍ പാമ്പുപിടിത്തക്കാരെ വിവരമറിയിച്ചു. ഉടനെ തന്നെ അവര്‍ സ്ഥലത്തെത്തി പാമ്പിനെ ചാക്കിലാക്കി. ഏറെ ബുദ്ധിമുട്ടിയാണ് പതിനെട്ട് അടിയോളം നീളം വരുന്ന ഈ കൂറ്റന്‍ പെരുമ്പാമ്പിനെ ചാക്കിനുളളിലാക്കിയത്.
ശേഷം വീട്ടില്‍ നിന്നും കൊണ്ടു പോയി. പിന്നീട് കാടിനുള്ളിലേക്ക് തുറന്നു വിട്ടു. പക്ഷികളേയും ചെറു ജീവികളുമാണ് പെരുമ്പാമ്പിന്റെ പ്രധാന ആഹാരം. എന്നാല്‍ കുരങ്ങുകളേയും മാനിനേയുമെല്ലാം നിഷ്പ്രയാസം ഇവ അകത്താക്കും. വിഷമില്ലാത്ത ഇനമായതിനാല്‍ ഇരകളെ വരിഞ്ഞു മുറുക്കിയാണ് കൊലപ്പെടുത്തുന്നത്. അമിതമായ ശരീരഭാരമുള്ളതിനാല്‍ ഇവ വളരെ സാവധാനത്തിലാണ് സഞ്ചരിക്കുന്നത്. ഇര വിഴുങ്ങി കഴിഞ്ഞാല്‍ പിന്നെ വേഗത്തില്‍ സഞ്ചരിക്കാന്‍ പ്രയാസമാണ്. എന്നാല്‍ മാസങ്ങളോളം ഭക്ഷണം കഴിക്കാതെ ജീവിക്കാനുള്ള കഴിവും പെരുപാമ്പുകള്‍ക്കുണ്ട്.
