പല അസുഖങ്ങളുടേയും ലക്ഷണങ്ങള്‍ നമ്മുടെ ശരീരം തുടക്കത്തിലേ കാണിച്ചു തുടങ്ങും. എന്നാല്‍ അതൊന്നും തന്നെ മനസ്സിലാക്കുകയോ അതിനു വേണ്ട ചികിത്സ നടത്തുകയോ നാം ചെയ്യാറില്ല. പല രോഗങ്ങളും തുടക്കത്തിലേ കണ്ടെത്തി തിരിച്ചറിഞ്ഞ് ചികിത്സിച്ചാല്‍ പരിഹരിയ്‌ക്കാന്‍ എളുപ്പമാണ്. ഇതിന് കഴിയാതെ വരുമ്പോഴാണ് പല അസുഖങ്ങളും ഗുരുതരമാകുന്നത്. ഇത്തരത്തില്‍ ഒന്നാണ് കാലിലെ നീര്.
കാലിലെ നീര് അല്‍പം പ്രായമായാല്‍ പലര്‍ക്കുമുണ്ടാകും. ഇതല്ലാതെ ഗര്‍ഭാവസ്ഥയിലും ഇതു കാണാം. നിസാര ആരോഗ്യ പ്രശ്നങ്ങളല്ലാതെ ഗുരുതരമായ പല രോഗങ്ങളുടേയും ലക്ഷണം കൂടിയാണിത്. കാലിലെ നീരിന് പുറകിലെ ആ ഗുരുതരമായ ആരോഗ്യ പ്രശ്‌നങ്ങളെ തിരിച്ചറിയാം. കാലിലെ നീരിന് പുറകിലെ പ്രധാന കാരണം കാലില്‍ വെള്ളം വന്നടിഞ്ഞു കൂടുന്ന അവസ്ഥയാണ്. ഇതിനാകട്ടെ, കാരണങ്ങള്‍ പലതാണ്. എഡിമ എന്നാണ് ഈ അവസ്ഥ അറിയപ്പെടുന്നത്. കാലിലെ രക്തക്കുഴലുകള്‍ക്ക് അവയ്‌ക്കുള്‍ക്കൊള്ളാന്‍ കഴിയുന്നതിനേക്കാള്‍ കൂടുതല്‍ ഫ്ളൂയിഡ് അടിഞ്ഞു കൂടുമ്പോഴാണ് ഇതുണ്ടാകുന്നത്.
ഹൃദയ പ്രശ്നങ്ങള്‍ ഇതിന് ഒരു കാരണമാകാറുണ്ട്. ഹൃദയത്തിന് വേണ്ട രീതിയില്‍ രക്തം പമ്പു ചെയ്യാന്‍ ആവാത്ത അവസ്ഥയില്‍ കാലില്‍ ദ്രാവകം അടിഞ്ഞു കൂടുന്ന കണ്‍ജെസ്റ്റീവ് ഹാര്‍ട്ട് ഫെയിലിയര്‍ എന്ന അവസ്ഥ.ഇതിനൊപ്പം ചുമ, ക്ഷീണം ശ്വാസമെടുക്കാന്‍ ബുദ്ധിമുട്ട്, തുടങ്ങിയ ലക്ഷണങ്ങളുമുണ്ടാകാം. കാലിലെ വെയിനുകളിലെ വാല്‍വുകള്‍ രക്തം ഹൃദയത്തിലേയ്‌ക്കു പമ്പു ചെയ്യാതിരിയ്‌ക്കുമ്പോഴാണ് കാലില്‍ ഇത്തരം പ്രശ്നങ്ങളുണ്ടാകുന്നത്.
വൃക്ക അഥവാ കിഡ്നികള്‍ക്കുണ്ടാകുന്ന തകരാറു കാരണവും ഇത്തരത്തില്‍ കാലുകളില്‍ നീരുണ്ടാകും. കിഡ്നിയ്‌ക്ക് അനാവശ്യവസ്തുക്കളും അധികം വരുന്ന വെള്ളവുമൊന്നും തന്നെ നീക്കം ചെയ്യാന്‍ സാധിയ്‌ക്കാതെ വരുമ്പോഴാണ് ഈ അവസ്ഥയുണ്ടാകുന്നത്. ഇത്, കൈ കാലുകളിലും ദേഹത്തുമെല്ലാം നീരായി വരും. മുഖത്തും ഇതുണ്ടാകും. അമിത ദാഹം, തളര്‍ച്ച, ശ്വാസംമുട്ട്, മുറിവ്, ബ്ലീഡിംഗ്, എന്നിവയെല്ലാം തന്നെ ഇതിന്റെ ലക്ഷണമാണ്.
ഇതിനു പുറമേ ഞരമ്പുകള്‍ തടിച്ചു വീര്‍ക്കുന്നതും കാലില്‍ നീരുമെല്ലാം വെരിക്കോസ് വെയിനുകള്‍കാലിലുണ്ടാക്കുന്ന മറ്റൊരു അവസ്ഥയാണ്. ഏറെ നേരം ഇരുന്നാലോ നിന്നാലോ കാല്‍ വേദന, ചര്‍മം വരണ്ടതാകുക, മുറിവുകള്‍ ചര്‍മത്തിന് നിറ വ്യത്യാസം, എന്നിവയെല്ലാം ഇതിന്റെ ലക്ഷണങ്ങളാണ്. ഹൃദയത്തിന്റെ രക്തം പമ്പിംഗ് കുറയുന്നത് തന്നെയാണ് ഇതിന് കാരണമാകുന്നത്. ഇതൊന്നുമല്ലാതെ സന്ധിവാതം കാരണവും ഇതുണ്ടാകാം. ഇത് ദ്രാവകം കെട്ടിക്കിടുന്നതല്ല. നീരു തന്നെയാണ്.
വാതത്തിന്റെ തന്നെ പല വിഭാഗങ്ങളിലും ഈ ലക്ഷണം കണ്ടു വരുന്നു.കൈ കാല്‍ മുട്ടുകളിലെ നീരാണ് ഇതിന് പ്രധാന കാരണമായി വരുന്നത്. തൈറോയ്ഡ് പോലെയുള്ള രോഗങ്ങളുടെ ലക്ഷണമായും ഇത്തരം നീരുണ്ടാകാം. ഇതിനു പുറമേ മസില്‍ ഉളുക്ക്, എല്ലിനുണ്ടാകുന്ന മുറിവ് എന്നിവയെല്ലാം കാലില്‍ നീരിന്റെ രൂപത്തില്‍ പ്രത്യക്ഷപ്പെടാവുന്നവയാണ്. കയ്യോ കാലോ ഒടിയുമ്പോഴും ഇത്തരം അവസ്ഥകളുണ്ടാകും.
