ഇന്ന് വർഷപ്രതിപത. ശ്രീകൃഷ്ണ ഭഗവാന്റെ സ്വർഗാരോഹണത്തോടെ ആരംഭിച്ച കലിയുഗത്തിന്റെ ആരംഭമായാണ് ചൈത്ര മാസത്തിലെ വർഷ പ്രതിപദ ദിനം കണക്കാക്കുന്നത്. രാഷ്ട്ര വൈഭവ ലക്ഷ്യത്തോടെ പ്രവർത്തിക്കുന്ന രാഷ്ട്രീയ സ്വയംസേവക സംഘത്തിന്റെ സ്ഥാപകൻ ഡോക്ടർ കേശവ ബലിറാം ഹെഡ്ഗേവാറിന്റെ ജന്മദിനം കൂടിയാണ് വർഷ പ്രതിപദ
‘സ്വന്തം മാതൃഭൂമിക്ക് വേണ്ടി സ്വജീവൻ പോലും ബലിയർപ്പിക്കാനുള്ള സന്നദ്ധതയാണ് യഥാർഥ ദേശസ്നേഹത്തിന്റെ സാരം. ലക്ഷക്കണക്കിന് യുവാക്കൾ സ്വന്തം ജീവിതകാലം ദേശ സ്വാതന്ത്ര്യത്തിനു വേണ്ടി അർപ്പണം ചെയ്താൽ മാത്രമേ ഇന്നത്തെ നമ്മുടെ രാഷ്ട്രത്തിന്റെ വിധി മാറ്റി എഴുതാനാകൂ.’ രാഷ്ട്ര പരംവൈഭവം ഒന്ന് മാത്രം ലക്ഷ്യമാക്കി പ്രവർത്തിക്കുന്ന രാഷ്ട്രീയ സ്വയംസേവക സംഘത്തിന്റെ സ്ഥാപകൻ ഡോക്ടർ കേശവ ബലറാം ഹെഡ്ഗേവാറിന്റെ വാക്കുകളാണിവ. ദേശ സ്നേഹത്തിന്റെ തീജ്വാലകൾ കോടി കോടി മനസ്സുകളിൽ ചൊരിഞ്ഞ മഹാമനീഷി. നൂറ്റാണ്ടുകളുടെ അടിമത്വത്തിൽ നിന്ന് ഈ നാടിന് മോചനം പ്രാപ്യമാവാൻ രാഷ്ട്ര ഭക്തിയുള്ള ജനതയാണുണ്ടാവേണ്ടത്, രാഷ്ട്ര വൈഭവതിനായി പ്രവർത്തിക്കുന്ന ഒരു സംഘടനയാണുണ്ടാവേണ്ടത് ഡോക്ടർജിയുടെ ഈ ചിന്തതന്നെയാണ് രാഷ്ട്രീയ സ്വയംസേവക സംഘമെന്ന മഹാ പ്രസ്ഥാനത്തിനും അതുവഴി കോടി സ്വയംസേവകർക്കും ബീജമായത്.
ശ്രീകൃഷ്ണ സ്വർഗാരോഹണത്തിന് ശേഷമുള്ള യുഗാദിയാണ് ചൈത്രമാസ വെളുത്ത പക്ഷത്തിലെ വർഷ പ്രതിപദ ദിനം. 1889 വർഷ പ്രതിപദ ദിനത്തിലാണ് ഡോക്ടർജിയുടെ ജനനം. രാഷ്ട്രായ സ്വാഹ ഇദം ന മമ എന്ന് ചിന്തിക്കുന്ന ഒരു തലമുറയുടെ കൂടി യുഗാദിയായിരുന്നു 1889 വർഷപ്രതിപദ. ഇന്നേ ദിവസം സ്വയംസേവകർ തങ്ങളുടെ ആദ്യ സർസംഘ ചാലകിന് പ്രണാം അർപ്പിക്കുന്നു. ഈ വർഷം വർഷപ്രതിപദയോടനുബന്ധിച്ചു ഭൂമി സുപോഷൺ അഭിയാന്റെ നേതൃത്വത്തിൽ ഭാരതമെമ്പാടും ഭൂമി പൂജയ്ക്കും പ്രകൃതി സംരക്ഷണ യജ്ഞത്തിനും ആരംഭമാവും. പ്രകൃതി സംരക്ഷണ സന്ദേശം ആഹ്വാനം ചെയ്താണ് ഓരോ ഗ്രാമങ്ങളിലും ഭൂമി സുപോഷൺ യജ്ഞം നടക്കുന്നത്. ദിവസങ്ങൾ നീണ്ടുനിൽക്കുന്ന വിവിധ പ്രകൃതി സംരക്ഷണ പരിപാടികളാണ് ആഹ്വാനം ചെയ്തിരിക്കുന്നത്.
Comments