മുംബൈ:വിരലിന് പരിക്കേറ്റ രാജസ്ഥാൻ റോയൽസ് താരം ബെൻ സ്റ്റാേക്സ് നാട്ടിലേക്ക് മടങ്ങുന്നു. രാജസ്ഥാൻ റോയൽസ് ടീം ഇംഗ്ലീഷ് താരം ബെൻ ബെൻ സ്റ്റാേക്സിന് വികാര നിർഭരമായ യാത്ര അയപ്പാണ് നൽകിയത്. മൂന്ന് മാസത്തെ വിശ്രമമാണ് ശസ്ത്രക്രിയയെ തുടർന്ന് വേണ്ടതെന്നാണ് ഡോക്ടർമാർ നിർദ്ദേശിച്ചിരിക്കുന്നത്. നാളെ ലീഡ്‌സിലെ ആശുപത്രിയിലാണ് കൈവിരലിന് ശസ്ത്രക്രിയ നടത്താൻ തീരുമാനിച്ചിരിക്കുന്നത്.
ടീം അംഗങ്ങൾ ഹോട്ടലിൽ ഒരുമിച്ച് കൂടിയാണ് ഇംഗ്ലീഷ് ഓൾറൗണ്ടർക്ക് യാത്ര അയപ്പ് നൽകിയത്. സ്റ്റോക്‌സിന്റെ പേര് എഴുതിയ ജഴ്‌സി ഓർമ്മയ്‌ക്കായി ക്യാപ്റ്റൻ സഞ്ജു സാംസൺ കൈമാറി. ഏതു ടീമും സ്വന്തമാക്കാൻ കൊതിക്കുന്ന അന്താരാഷ്‌ട്ര ക്രിക്കറ്റിലെ ഏറ്റവും മികച്ച ഓൾറൗണ്ടർ ടീമിനൊപ്പമില്ലാത്തത് വലിയ നഷ്ടമാണെന്ന് സഞ്ജു പറഞ്ഞു. ഐ.പി.എല്ലിൽ ഡൽഹിക്കെതിരെ കളിച്ചപ്പോഴാണ് കൈവിരലിന് പരിക്കേറ്റത്. നേരത്തേ തന്നെ ടീമിലെടുത്ത ഇംഗ്ലീഷ് പേസ് ബൗളർ ജോഫ്രാ ആർച്ചർ ഇനിയും കളിക്കാനിറങ്ങിയിട്ടില്ല. അതിന് പിന്നാലെയാണ് ബെൻ സ്റ്റോക്‌സ് മടങ്ങുന്നത്.
