തിരുവനന്തപുരം: അത്യാവശ്യഘട്ടങ്ങളില് ആവശ്യമായ രക്തത്തിന്റെ ലഭ്യത ഉറപ്പുവരുത്തുന്നതിനായി പുതിയ സംവിധാനം ഏര്പ്പെടുത്തി കേരള പോലീസ്. കേരള പോലീസിന്റെ ഔദ്യോഗിക മൊബൈല് ആപ്പായ പോല് ആപ്പിലാണ് ഈ പുതിയ സംവിധാനം ഏര്പ്പെടുത്തിയിരിക്കുന്നത്.
പോല് ബ്ലഡ് എന്ന ഈ സംവിധാനത്തിന്റെ ഉദ്ഘാടനം സംസ്ഥാന പോലീസ് മേധാവി ലോകനാഥ് ബെഹ്റ നിര്വഹിച്ചു. സംസ്ഥാന എയ്ഡ്സ് കണ്ട്രോള് സൊസൈറ്റിയുടെ സഹകരണത്തോടെയാണ് പുതിയ സംവിധാനം നടപ്പിലാക്കിയത്.
രക്തം ആവശ്യമുള്ള ആളുകള് ബ്ലഡ് ഗ്രൂപ്പ്, യൂണിറ്റ്, ആശുപത്രി, ബ്ലഡ് ബാങ്ക്, തീയതി എന്നീ വിവരങ്ങള് പോല് ബ്ലഡില് രജിസ്റ്റര് ചെയ്യണം. ഒപ്പം രക്തദാനം ചെയ്യാന് താല്പര്യമുള്ളവര്ക്കും പോല് ബ്ലഡ് ആപ്പ് ഡൗണ്ലോഡ് ചെയ്ത് ആവശ്യമായ വിവരങ്ങള് നല്കി പേര് രജിസ്റ്റര് ചെയ്യാം.
രക്തം ആവശ്യപ്പെട്ട് രജിസ്റ്റര് ചെയ്യുന്നവരെ പോലീസ് ബന്ധപ്പെട്ട് ലഭ്യത ഉറപ്പാക്കും. തിരുവനന്തപുരത്തെ പോലീസ് ആസ്ഥാനത്തെ പോല് ആപ്പ് കണ്ട്രോള് റൂമാണ് ഈ സംവിധാനം നിയന്ത്രിക്കുന്നത്. രാജ്യത്ത് ആദ്യമായാണ് ഒരു പോലീസ് സേന രക്തദാനത്തിനായി ഔദ്യോഗിക മൊബൈല് ആപ്പ് സംവിധാനം ഒരുക്കിയിരിക്കുന്നത്.
Comments