കൊറോണ പടര്ന്നു കയറി കൊണ്ടിരിക്കുന്ന ഈ സാഹചര്യത്തില് മാസ്ക് നമ്മുടെ ജീവിതത്തിലെ ഒഴിവാക്കാനാകാത്ത വസ്തുവായി മാറിക്കഴിഞ്ഞു. രണ്ടാം തരംഗത്തില് രണ്ട് മാസ്കുകള് ധരിക്കാനാണ് ആരോഗ്യ വിദഗ്ധര് ഇപ്പോള് നിര്ദ്ദേശം നല്കിയിരിക്കുന്നത്. മഹാമാരിയുടെ കാലത്ത് അതിന് അനുസരിച്ചുള്ള ആഭരണങ്ങളും വേണമെന്നാണ് ചിലരുടെ പക്ഷം. അതിനൊരു ഉത്തമ ഉദാഹരമാണ് ഈ മാസ്ക്ക്.വ്യത്യസ്തമായ ഈ മാസ്ക്കാണ് ഇപ്പോള് സോഷ്യല് മീഡിയയിലെ താരം.
ഐപിഎസ് ഉദ്യോഗസ്ഥനായ ദീപാന്ഷു കബ്ര ഉള്പ്പെടെയുള്ളവര് പുതിയ മാസ്ക് രീതി ട്വീറ്റ് ചെയ്തതോടെയാണ് മാസ്ക്ക് വൈറലായത്. വിവാഹ ആഘോഷത്തില് പങ്കെടുക്കാനെത്തിയ സ്ത്രീയുടെ ചിത്രമാണ് അദ്ദേഹം പങ്കിട്ടത് . പിങ്ക് നിറത്തിലുള്ള സാരിയും സ്വര്ണാഭരണങ്ങളും അണിഞ്ഞ ഒരു സ്ത്രീ തന്റെ മാസ്കില് കൂടി തന്റെ മൂക്കില് ധരിച്ചിരിക്കുന്ന സ്വര്ണ വളയങ്ങള് കൂടി പടര്ത്തിയിട്ടിരിക്കുന്ന ചിത്രമാണ് ദീപാന്ഷു കബ്ര പങ്കുവച്ചത്.
ജ്വല്ലറി ജുഗാദ് എന്ന ഹാഷ്ടാഗുമായി സൂപ്പര് അള്ട്ര പ്രോ മാസ്ക് എന്ന കുറിപ്പോടെയാണ് ദീപാന്ഷു ചിത്രം പങ്കുവച്ചത്. സ്വര്ണ്ണാഭരണങ്ങളോട് ഭ്രമം ഉള്ളപ്പോഴും മാസ്ക്ക് ഒഴിവാക്കാത്ത ജാഗ്രതയ്ക്കാണ് അഭിനന്ദനം. പരിമിതമായ വിഭവങ്ങള് കൊണ്ടും നൂതനവും ക്രിയാത്മകവുമായ ഉപായങ്ങള് കണ്ടെത്തുന്നതിനെയാണ് സാധാരണ ജുഗാദ് എന്ന പദം കൊണ്ട് സൂചിപ്പിക്കുന്നത്. എന്തായാലും പുതിയ ആഭരണ മാസ്ക്ക് സാമൂഹിക മാധ്യമങ്ങളില് ഹിറ്റ് ചാര്ട്ടില് ഇടം പിടിച്ചു.
