ലണ്ടന്‍: യൂറോ 2020 ഫുട്ബോള്‍ ചാമ്പ്യന്‍ഷിപ്പില്‍ ഇത്തവണയും പോര്‍ച്ചുഗലിനെ ക്രിസ്റ്റ്യാനോ തന്നെ നയിക്കും. മുഖ്യപരിശീലകനായ ഫെര്‍ണാണ്ടോ സാന്‍റോസാണ് 26 അംഗ ടീമിനെ പ്രഖ്യാപിച്ചത്. അടുത്തമാസമാണ് ടൂര്‍ണ്ണമെന്‍റ് ആരംഭിക്കുന്നത്.
യൂറോപ്പിലെ ഏറ്റവും മികച്ച താരമായ ക്രിസ്റ്റ്യാനോയ്‌ക്കൊപ്പം ലോകോത്തര താരങ്ങളായ ബ്രൂണോ ഫെര്‍ണാണ്ടസ്, ബര്‍ണാഡ് സില്‍വ, ഡിയാഗോ ജോട്ട, ജോ ഫെലിക്സ് എന്നിവരാണ് കുന്തമുനകളാവുക. ഇത്തവണ ഇവരേക്കാള്‍ ശ്രദ്ധനേടുക 22 കാരനായ ഫുട്ബോള്‍ പ്രതിഭ പെഡ്രോ ഗോണ്‍സാല്‍വസായിരിക്കും. ഇതുവരെ ദേശീയ ടീമിന് വേണ്ടി ബൂട്ടണിയാന്‍ കൗമാരതാരത്തിന് അവസരം ഉണ്ടായിട്ടില്ല. ഇവര്‍ക്കൊപ്പം നൂനോ മെന്‍ഡസും ജോ ഫാല്‍ഹിനയും ടീമിന്‍റെ കരുത്താകും. ഗ്രൂപ്പ് എഫില്‍ ഇത്തവണ ജര്‍മ്മനി, ഫ്രാന്‍സ്, ഹംഗറി എന്നിവര്‍ക്കൊപ്പമാണ് പോര്‍ച്ചുഗല്‍ കളിക്കേണ്ടത്.
മുപ്പത്തഞ്ചുകാരനായ ക്രിസ്റ്റ്യാനോ തന്‍റെ കരിയറിലെ അഞ്ചാമത്തെ യൂറോകപ്പിനാണ് കളിക്കാനിറങ്ങുന്നത്. ആറു ഗോളുകള്‍ കൂടി നേടിയാല്‍ ദേശീയ ടീമിനായി ഏറ്റവുമധികം ഗോള്‍ നേടുന്ന താരമായി ക്രിസ്റ്റ്യാനോയും മാറും. 109 ഗോളുകള്‍ നേടിയ ഇറാന്‍റെ അലി ദായി മാത്രമാണ് നൂറ് ഗോളുകളെന്ന നേട്ടം സ്വന്തമാക്കിയിട്ടുള്ള മറ്റൊരു താരം.
