യോഗ്യരായ വ്യക്തികളില് നിന്നും വിവാഹാലോചനകള് ക്ഷണിച്ചു കൊണ്ടുള്ള വിവാഹ പരസ്യങ്ങള് സാധാരണ കാണാറുണ്ട്. എന്നാല് ഈയിടെ സോഷ്യല് മീഡിയയില് വാക്സിന് സ്വീകരിച്ച വരനെ ആവശ്യമുണ്ട് എന്ന പേരില് പ്രചരിച്ച ഒരു വിവാഹ പരസ്യം. 24 കാരിയായ റോമന് കത്തോലിക്കാ പെണ്കുട്ടി, കോവിഷീല്ഡിന്റെ രണ്ട് ഡോസ് വാക്സിന് സ്വീകരിച്ച ബിരുദാനന്തര ബിരുദധാരികളില് നിന്ന് വിവാഹാലോചനകള് ക്ഷണിക്കുന്നുവെന്നാണ് പരസ്യം. സോഷ്യല് മീഡിയയില് വളരെയേറെ വൈറലായിരുന്നു ഈ പരസ്യം.
ഓണ്ലൈനില് പ്രത്യക്ഷപ്പെട്ട ഈ വിവാഹ പരസ്യത്തിന് മികച്ച പ്രതികരണമാണ് ലഭിച്ചത്. കൂടാതെ നിരവധി പേര് ഈ വിവാഹ പരസ്യം ഷെയര് ചെയ്തിരുന്നു.എന്നാല് ഇതൊരു യഥാര്ത്ഥ പരസ്യമല്ല എന്നതാണ് വാസ്തവം. കൊറോണ വാക്സിന് സ്വീകരിക്കാന് പരമാവധി ആളുകളെ എത്തിക്കുക എന്ന ശ്രമത്തിന്റെ ഭാഗമായി ഗോവയില് നിന്നുള്ള ഒരു ക്യാമ്പയിന്റെ ഭാഗമായി സാവിയോ ഫിഗ്യൂറെഡോ എന്ന വ്യക്തിയാണ് ഈ പരസ്യം പുറത്തുവിട്ടത്.
ഒരു വാക്സിനേഷന് സെന്ററിന്റെ കോണ്ടാക്റ്റ് നമ്പറിനൊപ്പം ”മാട്രിമോണിയലുകളുടെ ഭാവി” എന്ന തലക്കെട്ടിലുള്ള അദ്ദേഹത്തിന്റെ യഥാര്ത്ഥ പോസ്റ്റ് കഴിഞ്ഞ ആഴ്ച അദ്ദേഹം ഫേസ്ബുക്കില് പോസ്റ്റ് ചെയ്തിരുന്നു. വാക്സിന് എടുക്കാന് ആളുകളെ പ്രോത്സാഹിപ്പിക്കുക എന്ന ലക്ഷ്യത്തോടെയാണ് പരസ്യം സൃഷ്ടിച്ചതെന്നും തന്റെ ഫേസ്ബുക്ക് പേജില് അത് പോസ്റ്റ് ചെയ്തെന്നും എന്നാല് ഇത് യഥാര്ത്ഥമാണെന്ന് പലരും കരുതിയെന്നും സാവിയോ പറഞ്ഞു.രാജ്യത്ത് വിവിധ സംസ്ഥാനങ്ങളില് വാക്സിന് വിതരണം ഊര്ജിതമായി നടന്നു കൊണ്ടിരിക്കുകയാണ്.
