cഇടുക്കി: തൊടുപുഴയിലെ സിഎച്ച്ആർ മേഖലയിൽ നിന്ന് മരം വെട്ടിക്കടത്തിയ സംഭവത്തിൽ സിപിഐ നേതാക്കൾ ഉൾപ്പെടെ മൂന്ന് പേർക്കെതിരെ കേസ്. കാഞ്ചിയാർ മുൻ പഞ്ചായത്ത് പ്രസിഡന്റും സിപിഐ നേതാവുമായ വിആർ ശശി, സ്ഥലമുടമ മോഹനൻ, മരം വെട്ടിയ സുധീഷ് എന്നിവർക്കെതിരെയാണ് കേസെടുത്തിരിക്കുന്നത്.
അഞ്ച് ടൺ മരമാണ് ഇവർ അനധികൃതമായി വെട്ടിക്കടത്തിയത്. വിആർ ശശിയുടെ ഏലം സ്‌റ്റോറിലെ ആവശ്യത്തിനായിരുന്നു മരം വെട്ടിയത്. അതീവ പരിസ്ഥിതി പ്രാധാന്യമുള്ള ഏലമലക്കാടുകളിൽ നിന്ന് മരം വെട്ടുന്നതിന് മുൻകൂർ അനുമതി വേണം. എന്നാൽ അനുമതി ഇല്ലാതെ ചോരക്കാലി, കാട്ടുപത്രി തുടങ്ങിയ മരങ്ങൾ അനധികൃതമായി മുറിച്ച് മാറ്റുകയായിരുന്നു.
മുറിച്ച മരം വെള്ളിലാംകണ്ടത്ത് ഒളിപ്പിച്ചുവെയ്‌ക്കുകയും ചെയ്തിരുന്നു. സംഭവത്തിൽ അന്ന് കേസ് എടുത്തെങ്കിലും ആരേയും പ്രതിചേർക്കാതെ വനംവകുപ്പ് ഒത്തുകളിച്ചത് വാർത്തയായിരുന്നു. പിന്നാലെയാണ് ഇവർക്കെതിരെ കേസെടുത്തത്. പ്രതികൾക്കെതിരെ കുമളി സെക്ഷൻ ഫോറസ്റ്റ് ഓഫീസറാണ് കേസെടുത്തിരിക്കുന്നത്. പണി ആയുധങ്ങളും മരം കടത്താനുപയോഗിച്ച വാഹനവും കണ്ടെത്തേണ്ടതുണ്ടെന്നും അന്വേഷണം പുരോഗമിക്കുകയാണെന്നും വനംവകുപ്പ് അറിയിച്ചു.
