ലണ്ടൻ: വിംബിൾഡൺ പുരുഷവിഭാഗത്തിൽ റോജർ ഫെഡററും മെഡ്വെദേവും നാലാം റൗണ്ടിൽ പ്രവേശിച്ചു. കാമറോൺ നോറിയെയാണ് സ്വിസ് താരം തോൽപ്പിച്ചത്. ഒന്നിനെ തിരെ മൂന്ന് സെറ്റുകൾക്കാണ് ഫെഡറർ ജയിച്ചത്. ആദ്യ രണ്ടു സെറ്റുകളും 6-4,6-4ന് നേടിയ ഫെഡറർ മൂന്നാം സെറ്റ് 5-7ന് കൈവിട്ടു. എന്നാൽ 6-4ന് മൂന്നാം സെറ്റ് നേടിക്കൊണ്ട് പുൽത്തകിടിയുടെ പ്രതിഭ തന്റെ 1250-ാംമത്തെ മത്സരം സ്വന്തമാക്കി. ആറാം സീഡായ ഫെഡറർ 18-ാം തവണയാണ് വിംബിൾഡണിലെ നാലാം റൗണ്ടിലെത്തുന്നത്. ഇറ്റലിയുടെ ലോറൻസോ സൊനേഗോവാണ് എതിരാളി.
രണ്ടാം മത്സരത്തിൽ റഷ്യയുടെ ലോക രണ്ടാം നമ്പർ ഡാനിൽ മെഡ് വെദേവും നാലാം റൗണ്ടിൽ കടന്നു. 2017ലെ റണ്ണറപ്പ് ക്രൊയേഷ്യയുടെ മാറിൻ സിലിച്ചിനെയാണ് മെഡ് വെദേവ് മറികടന്നത്. ആദ്യ രണ്ടു സെറ്റുകളും 6-7, 3-6 എന്ന നിലയിൽ കൈവിട്ട ശേഷം നടത്തിയ ഗംഭീര തിരിച്ചു വരവാണ് മത്സരം കൈപ്പിടിയിലാക്കാൻ സഹായിച്ചത്. 6-3, 6-3, 6-2 എന്ന നിലയിലാണ് അടുത്ത മൂന്ന് സെറ്റുകളും മത്സരവും മെഡ്വെദേവ് സ്വന്തമാക്കിയത്. നാലാം റൗണ്ടിൽ പോളണ്ടിന്റെ ഹ്യൂബർട്ട് ഹുർകാസെസാണ് എതിരാളി.
