ന്യൂഡൽഹി:2022 ലെ റിപ്പബ്ലിക് ദിനത്തോടനുബന്ധിച്ച് വിതരണം ചെയ്യാനുള്ള ജനകീയ പത്മ പുരസ്‌കാരങ്ങൾക്ക് പ്രധാനമന്ത്രി നരേന്ദ്ര മോദി നാമനിർദ്ദേശം ക്ഷണിച്ചു. 2021 സെപ്തംബർ 15നാണ് അവസാന തീയതി. യോഗ്യരായുള്ളവരുടെ പേരുകൾ സമർപ്പിക്കാൻ പ്രധാനമന്ത്രി ട്വിറ്ററിലൂടെ ആവശ്യപ്പെട്ടു.
‘സമൂഹത്തിന്റെ അടിത്തട്ടിൽ അസാധാരണമായ പ്രവർത്തനങ്ങൾ ചെയ്യുന്ന നിരവധി കഴിവുള്ള ആളുകൾ ഇന്ത്യയിലുണ്ട്. മിക്കപ്പോഴും, അവയിൽ മിക്കതും നമ്മൾ കാണുകയോ കേൾക്കുകയോ ചെയ്യുന്നില്ല. പ്രചോദനം നൽകുന്ന അത്തരം ആളുകളെ നിങ്ങൾക്ക് അറിയാമോ? ജനകീയ പത്മയ്‌ക്കായി നിങ്ങൾക്ക് അവരെ നാമനിർദ്ദേശം ചെയ്യാം’ എന്നാണ് പ്രധാനമന്ത്രി ട്വീറ്റ് ചെയ്തത്.
സെപ്തംബർ 15 വരെ httsp://padmaawards.gov.in എന്ന സൈറ്റിൽ നാമനിർദ്ദേശങ്ങൾ നൽകാമെന്നും പ്രധാനമന്ത്രി കുറിച്ചു. പത്മ വിഭൂഷൺ , പത്മഭൂഷൺ, പത്മശ്രീ എന്നീ പത്മപുരസ്‌കാരങ്ങൾ, രാജ്യത്തെ ഏറ്റവും ഉയർന്ന സിവിലിയൻ അവാർഡുകളിൽ ഒന്നാണ്. റിപ്പബ്ലിക് ദിനത്തിലാണ് ഈ പുരസ്‌കാര ജേതാക്കളെ സർക്കാർ പ്രഖ്യാപിക്കുക.
പത്മ പുരസ്‌കാരങ്ങളെ പീപ്പിൾസ് പത്മ എന്ന പേരിലേക്ക് അടുത്തിടെ കേന്ദ്രസർക്കാർ മാറ്റിയിരുന്നു. പുരസ്‌കാരങ്ങളെ ജനകീയമാക്കുന്നതിന്റെ ഭാഗമായായിരുന്നു ഈ നീക്കം. പുരസ്‌കാരത്തിന് യോഗ്യരായവരെ കണ്ടെത്തുന്നതിനായി പ്രത്യേക സമിതിയെ നിയമിക്കണമെന്നും സംസ്ഥാന സർക്കാരുകളോട് കേന്ദ്രം ആവശ്യപ്പെട്ടിരുന്നു.
India has many talented people, who are doing exceptional work at the grassroots. Often, we don’t see or hear much of them. Do you know such inspiring people? You can nominate them for the #PeoplesPadma. Nominations are open till 15th September. https://t.co/BpZG3xRsrZ
— Narendra Modi (@narendramodi) July 11, 2021
