മണിരത്നം സംവിധാനം ചെയ്യുന്ന പുതിയ ചിത്രം പൊന്നിയിന് സെല്വന് ഒന്നാം ഭാഗത്തിന്റെ ക്യാരക്ടര് പോസ്റ്റര് പുറത്തുവിട്ടു. ആഴ്വാര്കടിയന് നമ്പിയെന്ന കഥാപാത്രത്തെയാണ് ജയറാം സിനിമയില് അവതരിപ്പിക്കുന്നത്. ജയറാം ഉള്പ്പെടെ താരങ്ങളെല്ലാം തന്നെ വന് മേക്ക് ഓവറിലാണ് ചിത്രത്തില് എത്തുന്നത്. വിദൂഷ സമാനമായ റോളാണ് ജയറാമിന്റേതെന്നാണ് റിപ്പോര്ട്ട്. ബാബു ആന്റണി, ലാല്, റിയാസ് ഖാന്, റഹ്മാന്, ഐശ്വര്യ ലക്ഷ്മി എന്നിവരാണ് സിനിമയിലെ മറ്റ് മലയാളി താരങ്ങള്. സുന്ദര ചോഴരുടെ കഥാപാത്രം പ്രകാശ് രാജാണ് അവതരിപ്പിക്കുന്നത്.
ആദ്യം അമിതാഭ് ബച്ചനായി തീരുമാനിച്ചിരുന്നതായിരുന്നു ഈ കഥാപാത്രം. ആദിത്യ കരികാലന്റെ വേഷം വിക്രം അവതരിപ്പിക്കും. മന്ദാകിനി എന്ന നായികാ പ്രാധാന്യമുള്ള കഥാപാത്രത്തെ ഐശ്വര്യ റായ് അവതരിപ്പിക്കുന്നു. കാസ്റ്റിങ്ങ് ലിസ്റ്റ് പുറത്തുവന്നതിനൊപ്പം ക്യാരക്ടര് പോസ്റ്ററുകള് സോഷ്യല് മീഡിയയില് വൈറല് ആണ്. പ്രശസ്ത എഴുത്തുകാരന് കല്കി കൃഷ്ണമൂര്ത്തിയുടെ ഇതേ പേരിലുള്ള നോവലിനെ അടിസ്ഥാനമാക്കിയാണ് സിനിമ ഒരുങ്ങുന്നത്. ഇന്ത്യയിലെ ഏറ്റവും വലിയ അമ്പലങ്ങളിലൊന്നായ തഞ്ചാവൂരിലെ ബൃഹദീശ്വര ക്ഷേത്രം നിര്മ്മിച്ച രാജ രാജ ചോളന് ഒന്നാമന് അരുള്മൊഴി വര്മന്റെ കഥയാണ് പൊന്നിയിന് ശെല്വന്.
ഇന്ത്യയിലെ ഏറ്റവും കൂടുതല് ബജറ്റില് ഒരുങ്ങുന്ന ചിത്രം കൂടിയാണ് പൊന്നിയന് സെല്വന്. 500 കോടിയാണ് സിനിമയുടെ ബജറ്റ്. മണിരത്നവും എഴുത്തുകാരന് ബി ജയമോഹനും ചേര്ന്നാണ് തിരക്കഥയൊരുക്കുന്നത്. തോട്ടാ ധരണിയാണ് സിനിമയുടെ കലാസംവിധായകന്. രവി വര്മനാണ് ഛായാഗ്രഹണം. എ ആര് റഹ്മാനാണ് സംഗീതം. മണിരത്നത്തിന്റെ പ്രൊഡക്ഷന് ഹൗസായ മദ്രാസ് ടാക്കീസും ലൈക്ക പ്രൊഡക്ഷന്സിന്റെ ബാനറില് അല്ലിരാജ സുബാസ്കാരനും ചേര്ന്നാണ് നിര്മ്മാണം.
