ജയസൂര്യയെ നായകനാക്കി നാദിര്ഷ സംവിധാനം ചെയ്യുന്ന ഏറ്റവും പുതിയ ചിത്രമാണ് ഈശോ. ചിത്രത്തിന്റെ രണ്ടാം മോഷന് പോസ്റ്റര് കഴിഞ്ഞ ദിവസമാണ് പുറത്തിറക്കിയത്. ചിത്രത്തിന്റെ പേരുമായി ബന്ധപ്പട്ടുളള വിവാദത്തെ തുടര്ന്ന് ടാഗ് ലൈന് ഒഴിവാക്കിയാണ് പുതിയ മോഷന് പോസ്റ്റര് പുറത്തിറക്കിയത്. എന്നാല് ഇപ്പോള് വിവാദങ്ങള് ഒഴിവാക്കാനായി ചിത്രത്തിന്റെ പേരു മാറ്റാന് തയ്യാറായിരിക്കുകയാണ് നാദിര്ഷ. സംവിധായകന് വിനയനാണ് ഇക്കാര്യം സമൂഹ മാദ്ധ്യമം വഴി പങ്കുവെച്ചിരിക്കുന്നത്.
ഫേസ്ബുക്ക് പോസ്റ്റിന്റെ പൂര്ണ്ണ രൂപം,
വിവാദങ്ങള് ഒഴിവാക്കുക…………………………. നാദിര്ഷാ ‘ഈശോ’ എന്ന പേരു മാറ്റാന് തയ്യാറാണ്…
‘ഈശോ’ എന്ന പേര് പുതിയ സിനിമയ്ക് ഇട്ടപ്പോള് അത് ആരെ എങ്കിലും വേദനിപ്പിച്ചിട്ടുണ്ടങ്കില് നാദിര്ഷയ്ക്ക് ആ പേര് മാറ്റാന് കഴിയില്ലേ?
ഇന്നു രാവിലെ നാദിര്ഷയോട് ഫോണ് ചെയ്ത് ഞാനിങ്ങനെ ചോദിച്ചിരുന്നു….. ആ ചിത്രത്തിന്റെ പോസ്റ്റര് ഇന്നലെ ഷെയര് ചെയ്തതിനു ശേഷം എനിക്കു വന്ന മെസ്സേജുകളുടെയും ഫോണ് കോളുകളുടെയും ഉള്ളടക്കം നാദിര്ഷയുമായി ഞാന് പങ്കുവച്ചു.. 2001-ല് ഇതു പോലെ എനിക്കുണ്ടായ ഒരനുഭവം ഞാന് പറയുകയുണ്ടായി.. അന്ന് ശ്രീ മമ്മുട്ടി നായകനായി അഭിനയിച്ച ‘രാക്ഷസരാജാവ്’ എന്ന ചിത്രത്തിന്റെ പേര് ‘രാക്ഷസരാമന്’ എന്നാണ് ആദ്യം ഇട്ടിരുന്നത്.. പുറമേ രാക്ഷസനേ പോലെ തോന്നുമെങ്കിലും അടുത്തറിയുമ്പോള് ശ്രീരാമനേപ്പോലെ നന്മയുള്ളവനായ രാമനാഥന് എന്നു പേരുള്ള ഒരു നായകന്റെ കഥയായതു കൊണ്ടാണ് രാക്ഷസരാമന് എന്ന പേരു ഞാന് ഇട്ടത്.
പക്ഷേ പ്രത്യക്ഷത്തില് രാക്ഷസരാമന് എന്നു കേള്ക്കുമ്പോള് ശ്രീരാമ ഭക്തര്ക്കു വിഷമം തോന്നുന്നു എന്ന ചിലരുടെ വാദം അംഗീകരിച്ചു കൊണ്ടാണ് അന്നാ പേരു മാറ്റാന് ഞങ്ങള് തയ്യാറായത്…സമൂഹത്തിലെ ഏതെങ്കിലും ഒരു വിഭാഗം അവന്റെ അഭയമായി കാണുന്ന വിശ്വാസങ്ങളെ മുറിവേല്പ്പിച്ച് കൈയ്യടി നേടേണ്ട കാര്യം സിനിമക്കാര്ക്കുണ്ടന്നു ഞാന് കരുതുന്നില്ല… അല്ലാതെ തന്നെ ധാരാളം വിഷയങ്ങള് അധസ്ഥിതന്റെയും പാര്ശ്വവല്ക്കരിക്കപ്പെട്ടവന്റേതുമായി വേണമെങ്കില് പറയാന് ഉണ്ടല്ലോ?…
ഇതിലൊന്നും സ്പര്ശിക്കാതെ തന്നെയും സിനിമാക്കഥകള് ഇന്റര്സ്റ്റിംഗ് ആക്കാം..
ആരെയെങ്കിലും ഈശോ എന്ന പേരു വേദനിപ്പിക്കുന്നെങ്കില് അതു മാറ്റിക്കുടേ നാദിര്ഷാ എന്ന എന്റെ ചോദ്യത്തിന് സാറിന്റെ ഈ വാക്കുകള് ഉള്ക്കൊണ്ടുകൊണ്ട് ഞാനാ ഉറപ്പു തരുന്നു… പേരു മാറ്റാം.. എന്നു പറഞ്ഞ പ്രിയ സഹോദരന് നാദിര്ഷായോട് എത്ര നന്ദി പറഞ്ഞാലും മതിയാകില്ല. പുതിയ പേരിനായി നമുക്കു കാത്തിരിക്കാം.. പ്രശ്നങ്ങള് എല്ലാം ഇവിടെ തീരട്ടെ…അരുണ് നാരായണ് പ്രൊഡക്ഷന്സിന്റെ ബാനറില് അരുണ് നാരായണനാണ് സിനിമ നിര്മിക്കുന്നത്. എന് എം ബാദുഷ, ബിനു സെബാസ്റ്റ്യന് എന്നിവരാണ് എക്സിക്യൂട്ടീവ് പ്രൊഡ്യൂസേര്സ്. സുനീഷ് വാരനാടാണ് തിരക്കഥ ഒരുക്കിയിരിക്കുന്നത്. നമിത പ്രമോദാണ് ചിത്രത്തിലെ നായിക.
