ന്യൂഡൽഹി: ഒളിംപിക്സ് വനിതാ ഹോക്കിയുടെ വെങ്കല മെഡലിനായുള്ള പോരാട്ടത്തിൽ പരാജയപ്പെട്ടെങ്കിലും തലയുയർത്തി തന്നെയാണ് ഇന്ത്യ മടങ്ങുന്നത്. ഏറെ പ്രതിസന്ധികളെ അതിജീവിച്ചായിരുന്നു ഇന്ത്യൻ വനിതകൾ ടോക്കിയോയിലേക്ക് വണ്ടി കയറിയത്. ക്വാർട്ടറിൽ പോലും കടക്കുമെന്ന് ഉറപ്പില്ലാതിരുന്ന ടീം സെമിയിൽ വരെയെത്തിയാണ് മടങ്ങിയത്. ഇപ്പോഴിതാ രാജ്യം ഒന്നടങ്കം നൽകിയ പിന്തുണയ്ക്ക് നന്ദി അറിയിച്ചുകൊണ്ട് വനിതാ ടീമിന്റെ കോച്ച് തന്നെ രംഗത്തെത്തിയിരിക്കുകയാണ്. ട്വിറ്ററിലൂടെയായിരുന്നു ജോര്‍ഡ് മാര്‍ജിന്റെ പ്രതികരണം.
നമുക്ക് ഒരു മെഡൽ നേടാനായില്ല, പക്ഷേ നമ്മുടെ നേട്ടം അതിലും വലുതാണെന്നാണ് ഞാൻ കരുതുന്നത്. ഞങ്ങൾ ഇന്ത്യക്കാരുടെ അഭിമാനം ഉയർത്തി. നിങ്ങൾ കഠിനാധ്വാനം ചെയ്യുകയും വിശ്വസിക്കുകയും ചെയ്യുന്നിടത്തോളം കാലം സ്വപ്നങ്ങൾ സാക്ഷാത്കരിക്കാമെന്ന് ദശലക്ഷക്കണക്കിന് പെൺകുട്ടികൾക്ക് ഞങ്ങൾ പ്രചോദനം നൽകി.! എല്ലാ പിന്തുണയ്‌ക്കും നന്ദി അറിയിക്കുന്നതായും ജോർഡ് മാർജിൻ പ്രതികരിച്ചു.
അതേസമയം, തോറ്റെങ്കിലും തലയുയർത്തി മടങ്ങിയ ഇന്ത്യൻ വനിതകൾക്ക് അഭിനന്ദന പ്രവാഹമാണ്. പ്രധാനമന്ത്രി നരേന്ദ്ര മോദി രാഷ്‌ട്രപതി രാംനാഥ് കോവിന്ദ് അടക്കമുള്ളവർ താരങ്ങൾക്ക് ആശംസയുമായി രംഗത്തെത്തി.
