ന്യൂഡൽഹി : ടോക്കിയോ ഒളിമ്പിക്സിൽ വെങ്കല മെഡലിനായുള്ള മത്സരത്തിൽ പൊരുതി തോറ്റ വനിതാ ഹോക്കി ടീമിനെ ഫോണിൽ വിളിച്ച് ആശ്വസിപ്പിച്ച് പ്രധാനമന്ത്രി നരേന്ദ്ര മോദി. പരാജയപ്പെട്ടതിന് ശേഷം നാട്ടിലേയ്ക്ക് മടങ്ങാൻ ഒരുങ്ങുന്നതിനിടെയാണ് പ്രധാനമന്ത്രിയുടെ അപ്രതീക്ഷിത ഫോൺ കോൾ എത്തിയത്. ടീമിലെ എല്ലാവരെയും പ്രശംസിച്ച പ്രധാനമന്ത്രി രാജ്യത്തെ സ്ത്രീകൾക്ക് മുഴുവൻ ഇത് പ്രചോദനമാണെന്നും കൂട്ടിച്ചേർത്തു.
നിങ്ങളുടെ വിയർപ്പും കഷ്ടപ്പാടും രാജ്യത്തെ കോടിക്കണക്കിന് സ്ത്രീകൾക്ക് പ്രചോദനമായെന്ന പ്രധാനമന്ത്രിയുടെ വാക്കുകൾ കണ്ണീരോടെയാണ് ടീമംഗങ്ങൾ കേട്ടത്. കളിയ്ക്കിടെ പരിക്ക് പറ്റി കണ്ണിന് സമീപം തുന്നൽ നടത്തേണ്ടിവന്ന നവനീത് കൗറിനെപ്പറ്റിയും പ്രധാനമന്ത്രി അന്വേഷിച്ചു. ഹോക്കിയിൽ മികച്ച പ്രകടനം കാഴ്ചവെച്ച വന്ദന കത്താരിയയെയും സാലിമ തെതെയെയും പ്രധാനമന്ത്രി പ്രത്യേകം അഭിനന്ദിച്ചു. ടീം ക്യാപ്റ്റൻ റാണി റാംപാൽ ആണ് പ്രധാനമന്ത്രിയ്ക്ക് വിതുമ്പലോടെ നന്ദിയറിയിച്ചത്.
‘കരച്ചിൽ നിർത്തു, നിങ്ങൾ കരയുന്നത് എനിക്ക് കേൾക്കാം.’ എന്നാണ് പ്രധാനമന്ത്രി മറുപടി നൽകിയത്. തോൽവിയിൽ നിരാശപ്പെടരുതെന്നും രാജ്യം നിങ്ങളെ ഓർത്ത് അഭിമാനിക്കുന്നുവെന്നും പ്രധാനമന്ത്രി വ്യക്തമാക്കി. രാജ്യത്തിന്റെ മുഖമുദ്രയായ ഹോക്കിയ്ക്ക് പതിറ്റാണ്ടുകൾക്ക് ശേഷം നിങ്ങളുടെ കഠിനാധ്വാനത്തിലൂടെ കൂടുതൽ പ്രാധാന്യം ലഭിക്കുകയാണെന്നും അദ്ദേഹം കൂട്ടിച്ചേർത്തു.
ഹോക്കി ടീം കോച്ച് ജോർഡ് മരിൻജെയെയും പ്രധാനമന്ത്രി അഭിനന്ദിച്ചു. രാജ്യത്തിന്റെ പ്രചോദനമാണ് നിങ്ങൾ എന്ന് ടീമംഗങ്ങളോട് പറയാറുണ്ടെന്നാണ് കോച്ച് മറുപടി നൽകിയത്. ഇന്ന് അവർക്കത് പൂർത്തീകരിക്കാൻ സാധിച്ചു എന്നും കോച്ച് വ്യക്തമാക്കി.
After the Bronze Medal match, Hon'ble Prime Minister Shri @narendramodi Ji spoke to the Indian Women's Hockey Team.
Thank you for your encouragement. 🙏#HaiTayyar #IndiaKaGame #Tokyo2020 #TeamIndia #TokyoTogether #StrongerTogether #HockeyInvites #WeAreTeamIndia #Hockey pic.twitter.com/UY5w7xGmHi
— Hockey India (@TheHockeyIndia) August 6, 2021
ഹോക്കിയിൽ പരാജയപ്പെട്ടെങ്കിലും ഇന്ത്യൻ വനിതകളെ എതിർ ടീം പോലും അഭിനന്ദിക്കുകയുണ്ടായി. അത്ഭുതപ്പെടുത്തുന്ന എതിരാളി എന്ന് പറഞ്ഞാണ് ഇന്ത്യൻ ടീമിനെ ബ്രിട്ടൺ പ്രശംസിച്ചത്.
Comments