നൗകാമ്പ് : വിടവാങ്ങൽ പ്രസംഗത്തിൽ വികാരാധീനനായി ഫുട്ബോൾ താരം ലയണൽ മെസി. ഏറെ വിഷമത്തോടെയാണ് ബാഴ്സലോണയിൽ നിന്നും വിടവാങ്ങുന്നതെന്ന് നൗകാമ്പിൽ നടന്ന വാർത്താ സമ്മേളനത്തിൽ അദ്ദേഹം പറഞ്ഞു. 21 വർഷം തന്നെ സ്നേഹിച്ച ആരാധകർക്കും ക്ലബിനും സഹതാരങ്ങൾക്കും മെസി നന്ദി രേഖപ്പെടുത്തി.
ബാഴ്സയോട് വിടപറയേണ്ടി വരുമെന്ന് ചിന്തിച്ചിട്ടില്ല. തുടരണമെന്ന് തന്നെയാണ് ആഗ്രഹിച്ചിരുന്നത്. നിലവിൽ ഒരുപാട് ക്ലബുകൾ തന്നെ സമീപിച്ചിട്ടുണ്ട്. പിഎസ്ജിയിൽ ചേരാനാണ് സാധ്യതയെങ്കിലും അക്കാര്യത്തിൽ തീരുമാനമെടുത്തിട്ടില്ല. നല്ലതും ചീത്തയുമായ ഒരുപാട് അനുഭവങ്ങൾ ഉണ്ടായിട്ടുണ്ട്. അതിൽ നിന്നെല്ലാമാണ് ഇന്നുകാണുന്ന മെസിയുണ്ടായത്. തന്റെ കരിയറിലെ തന്നെ ഏറ്റവും കഠിനമേറിയ ഘട്ടമാണിതെന്നും മെസി മാധ്യമങ്ങളോട് പറഞ്ഞു.
തുടർച്ചയായ 21 വർഷം കളിച്ചതിന് ശേഷമാണ് ബാഴ്സയിൽ നിന്നും മെസി പടിയിറങ്ങുന്നത്. കരാർ പുതുക്കാൻ കഴിയാഞ്ഞത് ക്ലബിൽ നിന്നും താരത്തിന്റെ വിടപറയലിലേക്ക് നയിക്കുകയായിരുന്നു. മെസി ബാഴ്സ വിടുന്നുവെന്ന വാർത്ത ഏറെ വേദനയോടെയാണ് ആരാധകർ കേട്ടറിഞ്ഞത്.
