ഗാംങ്ടോക്: സ്വാതന്ത്ര്യ ദിനം വ്യത്യസ്തമാക്കാൻ ഇന്തോ-ടിബറ്റൻ ബോർഡർ പോലീസ് സേനാംഗങ്ങൾ. ഇന്ത്യയുടെ 75-ാം സ്വാതന്ത്ര്യ ദിനാചരണത്തിന്റെ ഭാഗമായി സൈക്കിൾ പര്യടനമാണ് ഐടിബിപി ആരംഭിച്ചത്. ഏഴുദിവസം നീണ്ടു നിൽക്കുന്ന യാത്ര നാഥു ലാ ചുരത്തിൽ നിന്നുമാണ് ആരംഭിച്ചത്. യാത്ര സ്വാന്ത്ര്യദിനത്തിന്റെ അന്ന് രാവിലെ സിലിഗുരിയിൽ സമാപിക്കും. 225 കിലോമീറ്ററാണ് ഐടിബിപി സേനാംഗങ്ങൾ ഏഴു ദിവസംകൊണ്ട് പൂർത്തിയാക്കുന്നത്.
അമൃത മഹോത്സവം എന്ന് പേരിട്ടിരിക്കുന്ന ദേശീയ സ്വാതന്ത്ര്യ ദിനാഘോഷത്തിൽ ഫിറ്റ് ഇന്ത്യാ സന്ദേശവും പകരുക എന്നതാണ് ഐടിബിപി ഉദ്ദേശിക്കുന്നത്. ഐടിബിപിയുടെ 48-ാം ബറ്റാലിയനാണ് ഹിമാലയൻ സംസ്ഥാനമായ സിക്കിമിലുള്ളത്. ഒരു സംഘം സൈക്കിൾ പര്യടനം നടത്തുമ്പോൾ മറ്റുള്ളവർ മെഡിക്കൽ ക്യാമ്പുകളും കൊറോണ ബോധവൽക്കരണ പരിപാടികളുമാണ് ആസൂത്രണം ചെയ്യ്തിട്ടുള്ളത്. ഇതിനൊപ്പം വൃക്ഷം നടീൽ പരിപാടികളും പൊതുസമൂഹവുമായി ചേർന്ന് നടത്തും.
1962 ഒക്ടോബർ 24നാണ് ചൈനയുടെ ആക്രമണത്തിന് പിന്നാലെയാണ് ഇന്തോ-ടിബറ്റൻ ബോർഡർ പോലീസ് രൂപീകരിക്കപ്പെട്ടത്. നാലു ബറ്റാലിയനായി തുടങ്ങിയ അർദ്ധസൈനിക സേനാവിഭാഗം നിലവിൽ 56 ബറ്റാലിയനുകളിലായി 90,000 പേരുടെ വിശാല സേനയാണ്. ജമ്മുകശ്മീർ, ഹിമാചൽപ്രദേശ്, ഉത്തരാഖണ്ഡ്, സിക്കിം, അരുണാചൽ പ്രദേശ് എന്നീ സംസ്ഥാനങ്ങളിലെ ചൈനാ അതിർത്തികളിലെല്ലാം ഐടിബിപിയെയാണ് വിന്യസിച്ചിട്ടുള്ളത്.
