ന്യൂഡല്ഹി: വിദേശരാജ്യങ്ങളില് നിന്ന് കൊറോണ പ്രതിരോധ കുത്തിവെയ്പ്പ് സ്വീകരിച്ചവര്ക്ക് കേന്ദ്ര സര്ക്കാര് പോര്ട്ടലായ കോവിന് ആപ്പ് വഴി വാക്സിനേഷന് സര്ട്ടിഫിക്കറ്റ് ഡൗണ്ലോഡ് ചെയ്യാന് സൗകര്യം ഒരുങ്ങുന്നു. ഇത് സംബന്ധിച്ച നടപടികള് വേഗത്തിലാക്കുമെന്ന് കേന്ദ്ര സര്ക്കാരുമായി ബന്ധപ്പെട്ട ഉന്നതവൃത്തങ്ങള് വ്യക്തമാക്കി.
രാജ്യത്തെ ഡ്രഗ് റെഗുലേറ്ററി അതോറിറ്റി അംഗീകരിക്കാത്ത വിദേശ വാക്സിന് എടുത്തവര്ക്കും സര്ട്ടിഫിക്കറ്റ് നല്കുന്ന രീതിയിലാണ് സംവിധാനം ഒരുങ്ങുന്നത്. ഒരു ഡോസ് എടുത്തവര്ക്കും വാക്സിനേഷന് സര്ട്ടിഫിക്കറ്റ് ഡൗണ്ലോഡ് ചെയ്യാനാകും.
സംവിധാനം പ്രാബല്യത്തില് വരുന്നതോടെ ഇതിനകം പ്രതിരോധകുത്തിവെയ്പ്പ് എടുത്തവര് വീണ്ടും ഇന്ത്യയില് നിന്നും പ്രതിരോധകുത്തിവെയ്പ്പ് എടുക്കേണ്ടതില്ല. ഇത്തരം ആളുകള്ക്ക് കോവിന് പ്ലാറ്റ്ഫോം വഴി സര്ട്ടിക്കറ്റുകള് ഉറപ്പാക്കും.
മറ്റ് രാജ്യങ്ങളില് നിന്ന് ഫൈസര് പോലുള്ള വാക്സിനുകള് ഒന്നോ രണ്ടോ ഡോസ് സ്വീകരിച്ച ഇന്ത്യക്കാര്ക്കും വിദേശികള്ക്കും അന്താരാഷ്ട്ര യാത്രകള്ക്കുള്പ്പെടെ വിവിധ ആവശ്യങ്ങള്ക്ക് പ്രതിരോധകുത്തിവെയ്പ്പ് സര്ട്ടിക്കറ്റുകള് നിര്ബന്ധമായതിനാല് ഇത് ഏറെ സഹായകരമാകും.
Comments