മുംബൈ: ഹെലികോപ്റ്ററിന്റെ ബ്ലേഡ് തലയിൽ വീണ് യുവാവിന് ദാരുണാന്ത്യം. ഷെയ്ഖ് ഇസ്മയിൽ ഷെയ്ഖ് ഇബ്രാഹിം എന്ന 24കാരനാണ് അപകടം സംഭവിച്ചത്. ചൊവ്വാഴ്ച അർദ്ധരാത്രിയായിരുന്നു അപകടം. സ്വയം രൂപകൽപന ചെയ്ത് നിർമിച്ചെടുത്ത ഹെലികോപ്റ്റർ തന്നെയാണ് യുവാവിന്റെ ജീവനെടുത്തത്. യന്ത്രത്തകരാർ പരിശോധിക്കുന്നതിനിടെയാണ് സംഭവം.
മഹാരാഷ്ട്രയിലെ യവത്മൽ ജില്ലയിൽ സ്ഥിതിചെയ്യുന്ന ഫുൾസവാംഗി എന്ന ഗ്രാമത്തിലാണ് യന്ത്രനിർമിതിയിൽ തൽപരനായ ഷെയ്ഖ് ഇബ്രാഹിം താമസിച്ചിരുന്നത്. തന്റെ പണിപ്പുരയിൽ കഴിഞ്ഞ രണ്ട് വർഷമായി ഹെലികോപ്റ്റർ നിർമിക്കുന്ന തിരിക്കിലായിരുന്നു ഇബ്രാഹിം.
സ്വപ്ന സാഫല്യത്തിന്റെ അവസാന ഘട്ടമായപ്പോൾ ഹെലികോപ്റ്റർ പ്രവർത്തനത്തിൽ ചെറിയ തകരാറുള്ളതായി ഇബ്രാഹിം കണ്ടെത്തി. അത് പരിഹരിക്കുന്നതിനായുള്ള ശ്രമത്തിനിടെയാണ് അപകടമുണ്ടായത്. ഇബ്രാഹിമിനെ ഉടൻ തന്നെ ആശുപത്രിയിൽ എത്തിച്ചെങ്കിലും ചികിത്സക്കിടെ മരണത്തിന് കീഴടങ്ങുകയായിരുന്നു.
Comments