ദിസ്പൂർ : ടോക്കിയോ ഒളിമ്പിക്സ് വനിതാ വിഭാഗം ബോക്സിംഗിൽ വെങ്കലം നേടിയ ലവ്ലിന ബോർഗൊഹെയ്ന് ജോലി വാഗ്ദാനം ചെയ്ത് അസം സർക്കാർ. ലവ്ലിനയെ അസം പോലീസിൽ ഡെപ്യൂട്ടി സൂപ്രണ്ടായി നിയമിക്കാനാണ് തീരുമാനം. അസം മുഖ്യമന്ത്രി ഹിമന്ത ബിശ്വ ശർമ്മയാണ് ഇക്കാര്യം അറിയിച്ചത്.
രാജ്യത്തിന് അഭിമാനമായ ഒളിമ്പിക്സ് താരത്തെ അനുമോദിക്കാൻ ഗുവാഹത്തിയിൽ നടത്തിയ ചടങ്ങിലാണ് മുഖ്യമന്ത്രി ഇക്കാര്യം പ്രഖ്യാപിച്ചത്. ലവ്ലിനയുടെ അടുത്ത ലക്ഷ്യമായ പാരിസ് ഒളിമ്പിക്സ് നടക്കുന്നത് വരെ സർക്കാർ പ്രതിമാസം ഒരു ലക്ഷം രൂപ ധനസഹായം നൽകും. ഇത് കൂടാതെ ഗോലാഘട്ട് ജില്ലയിൽ ലവ്ലിനയുടെ പേരിൽ സ്പോർട്ടംഗ് കോംപ്ലക്സും നിർമ്മിക്കുമെന്ന് ഹിമന്ത ബിശ്വ ശർമ്മ അറിയിച്ചു.
ഇന്ന് രാവിലെയോടെ അസമിലെത്തിയ താരത്തെ മുഖ്യമന്ത്രി നേരിട്ടെത്തിയാണ് സ്വീകരിച്ചത്. ഗുവാഹട്ടി വിമാനത്താവളത്തിലെത്തിയ ലവ്ലിനയെ മുഖ്യമന്ത്രിയോടൊപ്പം കായിക മന്ത്രി ബിമൽ ബോറയും മറ്റ് ഉന്നത ഉദ്യോഗസ്ഥരും ചേർന്നാണ് സ്വീകരിച്ചത്. അഭിമാനത്തോടെയും ആദരവോടെയും രാജ്യത്തിന്റെ പ്രിയപ്പെട്ട ഒളിമ്പ്യനെ സ്വീകരിക്കുന്നതായാണ് മുഖ്യമന്ത്രി ഹിമന്ത ബിശ്വ ശർമ്മ പറഞ്ഞത്. നൂറുകോടി സ്വപ്നങ്ങൾക്ക് വെളിച്ചമേകിയ വിജയമാണ് ലവ്ലിന നേടിയതെന്നും ശർമ്മ കൂട്ടിച്ചേർത്തു. തുടർന്ന് തനിക്ക് ഇത്ര വലിയ സ്വീകരണമൊരുക്കിയ അസം സർക്കാരിന് നന്ദി അറിയിക്കുന്നതായി ലവ്ലിന പറഞ്ഞു.
Comments