ഭുവേനശ്വര്: രക്ഷാബന്ധന് മഹേത്സവത്തിന് പ്രകൃതി സൗഹൃദ രാഖികള് തയ്യാറാക്കി ഒഡീഷയിലെ വനിതാ സ്വയം സഹായ സംഘങ്ങള്. ഒഡീഷ ഗ്രാമ വികസന വിപണന സംഘത്തിന്റെ സഹകരണത്തോടെയാണ് ഗ്രാമീണ മേഖലയിലെ സ്ത്രീ കൂട്ടായ്മകള് രാഖി നിര്മ്മിക്കുന്നത്.
ഖോര്ദ, ജെജ്പൂര്, ജഗത്സിങ്പൂര്,മയൂര്ബഞ്ച്, കിയോഞ്ചര് എന്നീ ജില്ലകളില് നിന്നുളള സഹായക സംഘങ്ങളാണ് രാഖി നിര്മ്മിക്കുന്നത്. കഴിഞ്ഞ വര്ഷം മുതലാണ് പ്രകൃതി സൗഹൃദ രാഖികള് നിര്മിച്ച് തുടങ്ങിയത്. കോവിഡ് കാരണം ദുരിതമനുഭവിക്കുന്ന ഗ്രാമീണ മേഖലയിലെ സ്ത്രീകള്ക്ക് രാഖി വില്പനയിലൂടെ വരുമാനം കണ്ടെത്താനാകുമെന്ന് സംരഭത്തിന് നേതൃത്വം നല്കുന്ന സംഘത്തിലെ അംഗമായ പ്രണബ് പാണ്ഡ പറഞ്ഞു.
രാഖി നിര്മ്മാണത്തിന് പ്രാദേശികമായി ലഭിക്കുന്ന പ്രകൃതി വിഭവങ്ങള് മാത്രമാണ് ഉപയോഗിക്കുന്നത്. ടെറാക്കോട്ട സബായ് പുല്ലും പയറും മറ്റ് ജൈവവസ്തുക്കളുമാണ് നിര്മാണത്തിന് ഉപയോഗിക്കുന്നത്. രാഖികള്ക്ക് ആവശ്യക്കാര് ഏറെയുണ്ടെന്ന് വില്പന നടത്തുന്ന വനിതകള് പറഞ്ഞു. പ്രാദേശിക ഉല്പന്നങ്ങള് കൊണ്ട് നിര്മ്മിക്കുന്നതിനാല് വിലയും കുറവാണ്.
